Porsche ka rritur përsëri çmimet bazë për të gjithë gamën e saj të modeleve, duke përmendur si arsye “kushtet e tregut”. Megjithëse makinat e kësaj marke kanë qenë gjithmonë të shtrenjta, ky vendim i fundit për rritjen e çmimeve ka tërhequr vëmendje, veçanërisht për shkak të ndikimit që mund të ketë në modelet më të përballueshme si Cayenne dhe Macan.
Fillimisht raportuar nga Road & Track dhe më pas konfirmuar nga vetë prodhuesi gjerman, rritja e çmimeve prek të gjithë modelet, me një diferencë që varion nga 2.3% deri në 3.6%.
Në një deklaratë zyrtare, një zëdhënës i kompanisë u shpreh:
“Me klientët tanë në mendje, ne ndjekim nga afër kushtet e tregut, absorbojmë kostot aty ku mundemi dhe bëjmë rregullime vetëm kur është absolutisht e nevojshme. Kur është e mundur, kemi ndërmarrë hapa për të mbështetur klientët, por kushtet aktuale kërkojnë rregullime të pjesshme në çmimet bazë.”
Përveç çmimit të vetë makinës, janë rritur edhe tarifat për opsionet shtesë dhe kostot e dorëzimit, që do të thotë se çmimi final për disa versione mund të tejkalojë lehtësisht rritjen zyrtare prej 3.6%.
Megjithëse Porsche nuk e përmend drejtpërdrejt çështjen e tarifave doganore, situata është e ndërlikuar nga fakti që kompania nuk prodhon makina në SHBA. Të gjitha modelet e saj prodhohen në Gjermani, me përjashtim të Cayenne-it, që ndërtohet në Sllovaki dhe në sasi të vogla në Malajzi për tregun aziatik.
Sipas Motor1, tarifat 25% për makinat dhe pjesët e importuara, të vendosura nga administrata Trump që në prill, janë ende në fuqi, ndërsa së fundmi ish-presidenti ka kërcënuar me një tarifë 30% për të gjitha mallrat nga BE-ja gjë që do të godiste drejtpërdrejt edhe makinat Porsche.
Më herët këtë vit, u raportua se Porsche po shqyrton mundësinë e hapjes së një fabrike prodhimi në SHBA, por për momentin nuk ka asgjë konkrete. Ndërkohë, klientët amerikanë, edhe pse të mësuar me çmime të larta, mund të ndihen të goditur veçanërisht në segmentet me volum të lartë si SUV-të Cayenne dhe Macan.
Përveç çmimeve në rritje, Porsche po përballet me sfida edhe në tregjet ndërkombëtare. Shitjet globale kanë rënë ndjeshëm veçanërisht në Kinë, ku konsumatorët po anashkalojnë markat e huaja.
Edhe pritshmëritë për makinat elektrike si Taycan dhe Macan Electric nuk janë përmbushur. Në SHBA, shitjet kanë mbetur të qëndrueshme, por adaptimi i ngadaltë i EV-ve dhe tarifat doganore po komplikojnë situatën.
Nga një histori suksesi që dominonte industrinë, Porsche po kalon tani një fazë më delikate, me fitime ende të larta, por jo më në shkëlqimin që e karakterizonte në vitet e fundit. Siç duket, edhe në Stuttgart po shkruhet një kapitull i ri për rendin e ri të industrisë së makinave. /AutoPortali
