Shefi i ekipit Red Bull, Laurent Mekies, ka thënë se zhvillimi i mëtejshëm i makinës aktuale RB21 është vendimi i duhur, edhe nëse ndikon negativisht në përgatitjet për sezonin 2026, kur do të hyjnë në fuqi rregullore të reja në Formula 1.

Red Bull ka sjellë përmirësime të rëndësishme së fundmi, një dysheme të re në Monza dhe një krah të përparmë të ri në Singapor dhe këto ndihmuan në përmirësimin e performancës.

Sipas Mekies, zhvillimi i mëtejshëm i RB21 është thelbësor për të verifikuar saktësinë e mjeteve të simulimit dhe metodologjisë, të cilat do të përdoren edhe për makinën e vitit 2026. Ai pranoi se kjo strategji ka një kosto, por është një kompromis i qëllimshëm për të ndërtuar një bazë të sigurt.

“Nëse nuk e kuptojmë si funksionon makina tani, do të hyjmë ‘të verbër’ në 2026”, tha Mekies.

Në kontrast, ekipe si McLaren dhe Mercedes kanë ndaluar zhvillimet për vitin 2025 për të fokusuar të gjitha burimet në makinën e re për 2026. McLaren e justifikon këtë sepse ka pasur kontroll të mirë mbi renditjen në konstruktorë dhe ka siguri në korrelacionin midis simulimeve dhe rezultateve në pistë.

Për Red Bull, e cila pati probleme në përputhjen mes simulimeve dhe realitetit në vitin 2024, është thelbësore që gjithçka të jetë e kalibruar saktë përpara se të ndërtojnë makinën për epokën e re të F1.