Tregu kinez i automjeteve është tronditur sërish nga Volkswagen ID.Era 5S, një limuzinë me përmasa të ngjashme me Passat-in, por me një çmim fillestar prej vetëm 89.900 juanë, rreth 11.500 euro. Pas përfundimit të ofertës promocionale, çmimi normal pritet të jetë rreth 15.000 euro.

Për krahasim, Volkswagen-i më i lirë i ri në Gjermani, Polo, kushton mbi 20.000 euro, ndërsa Dacia Sandero nis nga rreth 13.590 euro.

ID.Era 5S është zhvilluar në bashkëpunim mes Volkswagen dhe gjigantit kinez SAIC.

Plug-in hibrid me vetëm 11.500 euro

Modeli ka një sistem plug-in hibrid, me motor benzine 1.5 litra dhe 109 kuaj fuqi, të kombinuar me një motor elektrik prej 237 kuajsh. Bateria 19,1 kWh mundëson deri në 160 kilometra vetëm me energji elektrike, sipas ciklit kinez CLTC.

Brenda, makina ka një ekran qendror 15,6 inç dhe instrumente dixhitale 8,8 inç, ndërsa dizajni është përshtatur kryesisht për tregun kinez.

A do të vijë në Evropë?

Mundësia e ardhjes së ID.Era 5S në Evropë po tërheq vëmendje. Sipas Handelsblatt, Volkswagen po shqyrton mundësinë që disa modele të zhvilluara në Kinë t’i importojë ose t’i prodhojë për tregun evropian.

Megjithatë, nëse modeli arrin në Evropë, çmimi nuk do të mund të mbetet 15.000 euro, për shkak të tarifave doganore, transportit, taksave dhe standardeve më të rrepta evropiane.

Sidoqoftë, fakti që Volkswagen mund të ofrojë në Kinë një limuzinë të kësaj madhësie me një çmim kaq të ulët tregon se gara në tregun global të automjeteve është bërë jashtëzakonisht e ashpër.