Derisa shumica e futbollistëve elitë të ditëve të sotme zgjedhin modelet më të reja të supermakinave luksoze për t’u mburrur me pagat e tyre të mëdha, mbrojtësi i Manchester City-t, Josko Gvardiol, vendosi të bëjë diçka krejt ndryshe dhe fitoi menjëherë simpatinë e publikut.
Gvardiol u filmua teksa po largohej nga kompleksi stërvitor i “Qytetarëve”. Teksa lëvizte ngadalë në rrugën e daljes, ai ndaloi me mirësjellje për t’i dhënë autograf një tifozi të ri. Më pas falënderoi dhe, me një buzëqeshje, i tregoi gishtin e madh personit që po e filmonte.
Megjithatë, ylli kryesor i kësaj videoje virale nuk ishte vetë futbollisti, por “kafsha shtëpiake” e tij e jashtëzakonshme me katër rrota, një Mitsubishi Lancer Evolution VI, në ngjyrë të kuqe të ndezur, me ngjitëse karakteristike të garave rally dhe disqe të bardha.
Njohësit e vërtetë të automobilizmit e kuptuan menjëherë se nuk bëhej fjalë për një makinë të zakonshme, por për serinë kult dhe të kufizuar “Tommi Mäkinen Edition”, e prodhuar për nder të legjendarit finlandez dhe katër herë kampionit të botës në rally, në fund të viteve ’90.
Vendimi për të drejtuar një makinë që konsiderohet një ikonë absolute e motorsportit, në vend që të shfaqte makinat moderne dhe jashtëzakonisht të shtrenjta, i solli Gvardiolit shumë simpati.
Videoja grumbulloi në kohë rekord më shumë se 250.000 shikime dhe mijëra pëlqime, ndërsa komentet shpërthyen:
“Më në fund një futbollist që nuk mburret, por drejton një makinë të vërtetë!”
“Gvardiol di çfarë bën.”
“I vetmi futbollist me shije që kam parë deri tani. Kjo është një makinë e mrekullueshme!”
“Më në fund një futbollist me shije të vërtetë!”
Njëri prej ndjekësve ndoshta e përmblodhi më së miri përshtypjen e miliona njerëzve që e panë videon:
“Çfarë legjende. Mund të kishte fjalë për fjalë çdo makinë që dëshiron, ndërsa ai vjen në stërvitje me një Tommi Mäkinen Evo. Legjendë absolute!”
Në fakt, kjo nuk është hera e parë që Gvardiol shfaqet me një makinë “ekzotike” në një parking ku dominojnë modele me logot e Lamborghini, Ferrari, Aston Martin, Mercedes dhe Porsche.
⚽️ Manchester City futbolcuları, araçlarıyla antrenmana teşrif ediyor.
🇭🇷 Josko Gvardiol, VW Golf R Black Edition ile katılım sağlamış.
— BBO Sports (@bbosports) October 20, 2025
Sezonin e kaluar, ai shkonte rregullisht në stërvitje me versionin sportiv R të Volkswagen Golf-it.
Futbollisti kroat në koleksionin e tij ka edhe disa makina të tjera klasike, si Golf R32 dhe Mercedes SL 600 Cabriolet. Ndërsa kur ishte në Zagreb, te Dinamo, ai përdorte transportin publik!
