Liridon Kalenderi ka arritur sukses historik për automobilizmin kosovar, duke triumfuar në garën në disiplinën malore, në Shtenberk të Çekisë.

Kalenderi pati paraqitje fantastike, duk i lënë pas vetes garues me shumë përvojë e kampionë të shumfishtë.

“Jam i lumtur për këtë sukses, pasi e kam përfaqësuar Kosovën në mënyrën më të mirë”, ka thënë Liri për faqen zyrtare të FASK-ut.

“Ka qenë sfidë mjaft e vështirë, jo vetëm për shkak të konkurrencës, por edhe për shkak të problemeve teknike që i patëm dhe motit me shi. Gjithsesi ia dolëm me sukses dhe jam shumë i kënaqur, ndërsa dua ta falënderoj ekipin tim, që punoi ditë e natë për t’i sanuar problemet dhe më mundësuan pjesëmarrjen në garë”, ka shtuar Kalenderi.

Sfida e tij e radhës do të jetë në Poloni.

“Kishim planfikuar të shkojmë në Gjermani, por ekipi im është i zënë, prandaj kemi vendosur të shkojmë në Poloni, që është edhe dëshirë e tyre. Shpresoj që edhe atje të arrij rezultat të mirë”, është shprehur optimist Liridon Kalenderi.