Atletico Madrid është skuadra e tetë që e ka siguruar çerekfinalen e Ligës së Kampionëve.

Skuadra spanjolle këtë sukses e ka arritur vetëm pas gjuajtjes së penalltive.

Koha e rregullt dhe vazhdimet dy here nga 15 minuta përfunduan me rezultat 2:1, por në ndeshjen e zhvilluar në Milano, Inter pati fituar me 1:0.

Zikaltërit kaluan të parët në epërsi, kur zhvillohej minuta e 33-të, me Nicolo Barella që asistoi te Federico Dimarco që ishte i saktë për 1-0.

Por, pas dy minutash, Atletico Madridi arriti të barazojë rezultatin me anë të Antoine Griezmann për 1-1.

Pjesa e dytë sikurse e para, solli raste nga të dyja palët, ku Griezmann dhe Marcus Thuram kishin raste të mira për të kaluar skuadrat e tyre në epërsi.

Kur pritej që Interi të kalonte në çerekfinale, në skenë doli Memphis Depay që fillimisht goditi shtyllën, pastaj në aksionin e radhës shënoi për 2-1.

Deri në fund të kohës së rregullt nuk kishte më gola dhe skuadrat shkuan në vazhdime.

Edhe dy herë nga 15 minuta ishin të bukura, me aksione nga të dyja palët.

Në minutën e 97-të, Memphis Depay, rrezikoi por Yann Sommer kësaj radhe ishte në vend. Pas një minute, ishte Lautaro Martinez, që mund të kalonte Interin në epërsi, por që as ky nuk ishte i saktë.

Pas vazhdimeve, skuadra shkuan në penallti, ku më të mirë dolën Atletico Madridi të cilët fituan me rezultat 4-3.