Çdo verë, miliona turistë vizitojnë plazhet më të njohura të Evropës, me ëndrrën për një arratisje idilike. Por shpesh, realiteti nuk përputhet me imazhet përrallore që shohim online, shkruan Euronews, transmeton AutoPortali.

Sipas një raporti të ri nga kompania Cloudwards, plazhet evropiane janë ndër më të ankuarat në botë sidomos për shkak të mbipopullimit. Raporti analizon 200 nga plazhet më të vizituara në botë, bazuar në vlerësimet e TripAdvisor, duke përdorur fjalë kyçe për të identifikuar ankesat më të shpeshta.

Nga plazhet e ngjeshura në Sardenjë deri te festat 24 orëshe në Greqi, raporti zbulon hendekun e madh mes fotove “Instagram-i” dhe realitetit në terren.

Evropa dominon për mbipopullim

Nëse keni ecur ndonjëherë kilometra për të gjetur një copëz rere të lirë, ose keni ndarë detin me një flotilje balonash në formë njërzorësh të fryrë, nuk do të çuditeni: tetë nga dhjetë plazhet më të kritikuara për mbipopullim ndodhen në Evropë.

Në krye të listës evropiane qëndron plazhi Bournemouth në Angli, i cili renditet i pesti në nivel global. Vizitorët ankohen për pastërtinë dhe turmat e mëdha. Por Italia është edhe më keq.

Plazhi La Pelosa në veriperëndim të Sardenjës një rërë e bardhë e rrethuar me ujëra të kaltërta kryeson listën globale për ankesat mbi mbipopullimin: rreth 87% e vlerësimeve negative përmendin këtë problem. Një vizitor e përshkroi situatën kështu: “Ishte mëngjes i një dite të zakonshme në shtator, por turmat dukeshin si në Londër, New York apo Sydney në natën e Vitit të Ri.”

Plazhi tjetër sardenjas, Spiaggia La Cinta, me pesë kilometra rërë të bardhë e rrethuar me shkurre dhe duna, renditet i dyti në këtë kategori.

Më pas vijnë plazhi Praia da Falésia në Portugali i njohur për rërën e artë dhe shkëmbinjtë e lartë si dhe Cala Comte në Ibiza dhe Konnos Bay në Qipro, që shpesh përshkruhet si “një copëz parajse ishullore”, pavarësisht mbingarkesës.

Plazhet greke ndër më të zhurmshmet dhe më të papastërta por gjithashtu ndër më të vizituarat

Greqia ka performuar më mirë për sa i përket mbipopullimit, por ka dalë keq në kategori të tjera.

Laguna Balos në Kretë renditet e 26-ta në botë dhe e shtata për papastërti, me gati gjysmën e ankesave që përmendin mungesën e pastërtisë dhe 40% të tjera që flasin për mbipopullim.

Elafonissi, një tjetër plazh i dashur në Kretë, me rërë në nuancë rozë dhe ujëra të cekët, është i shtati në listën globale të plazheve më të ankuara. Më shumë se 70% e vlerësimeve negative përmendin mbipopullimin, por pak flasin për papastërti ose zhurmë.

Ndërkohë, plazhi Porto Katsiki në Lefkada, që duket si në kartolina, renditet në dhjetëshen më të keqe globale për zhurmë dhe trazira. Megjithatë, revista “50 Plazhet më të Mira në Botë” e ka renditur të 36-tin për vitin 2025 një dëshmi e qartë e presionit që fama globale ushtron mbi destinacionet natyrore.

Si u përpiluan renditjet

Cloudwards analizoi mbi 1.3 milionë vlerësime në TripAdvisor për 200 plazhe në mbarë botën. U filtruan komentet negative përmes fjalëve kyçe që lidhen me katër kategori kryesore: papastërti, mbipopullim, radhë të gjata dhe zhurmë.

Çdo plazh mori një “pikë ankese” nga 0 në 100, bazuar në frekuencën e ankesave. Sa më i lartë rezultati, aq më të shpeshta ishin kritikat.

Kjo e bën edhe më të habitshme që plazhe ikonike si Waikiki në Hawaii të marrin vlerësimin 100 për të gjitha arsyet e gabuara.

Rregulloret e reja mund të ndihmojnë në menaxhimin e presionit turistik

Shumica e këtyre plazheve vuajnë nga e njëjta formulë problematike: sipërfaqe të kufizuara, fluks maksimal në sezon dhe famë virale që ka tejkaluar infrastrukturën dhe ka rënduar komunitetet lokale.

Disa prej tyre tashmë po marrin masa për të luftuar mbingarkesën turistike dhe për të mbrojtur ambientin si dhe reputacionin.

Sardenja ka udhëhequr nismat evropiane me masa të reja për verën, si kufizime ditore të vizitorëve, prenotime të detyrueshme dhe ndalimin e përdorimit të peshqirëve për të parandaluar erozionin e rërës.

Në Greqi, që nga viti 2025 është vendosur një tarifë hyrëse prej 20 eurosh për pasagjerët e anijeve turistike që zbarkojnë në ishuj të tejmbushur si Mykonos dhe Santorini.

Ndërkohë, Spanja ka ndaluar konsumin e alkoolit në disa plazhe dhe ka vendosur gjoba për sjelljet e pahijshme.

Të gjitha këto janë pjesë e një përballjeje më të gjerë që Evropa po bën me mbingarkesën turistike – nga qytetet deri në brigjet e saj.

Ky sezon vere, premtimi i pushimeve të përsosura në plazh po përballet me turma, kaos dhe një hendek në rritje mes pritjes dhe realitetit. Në epokën e filtrave dhe famës virale, edhe parajsa ka një pikë thyerjeje. /AutoPortali