Skuadra kampione e Kosovës, Drita, do të zbresë sonte në fushë për ndeshjen e dytë në fazën e grupeve të UEFA Conference League, ku do të përballet me ekipin e njohur qipriot Omonia Nicosia.
Përballja do të zhvillohet nga ora 18:45 në stadiumin “Fadil Vokrri” në Prishtinë dhe pritet të mbledhë një numër të madh tifozësh, të cilët do të jenë mbështetja kryesore e gjilanasve.
Pas debutimit të tyre historik në këtë garë evropiane, Drita kërkon që përballë një kundërshtari me përvojë të madhe ndërkombëtare të tregojë karakter dhe forcë, duke synuar të marrë pikët e para në grup.
Trajneri i gjilanasve pritet të hedhë në fushë formacionin më të fortë të mundshëm, duke u mbështetur në lojtarë kyç si Marko Simonovski, Bardh Shabani dhe Andrion Zeqiri, që kanë treguar formë të mirë në ndeshjet e fundit.
Omonia Nicosia është një nga skuadrat më të suksesshme të futbollit qipriot, ajo ka fituar 21 herë titullin kampion, 16 herë Kupën e Qipros dhe 17 herë Superkupën, duke u konfirmuar si një forcë e madhe në nivel vendor.
Përvoja e tyre në garat evropiane është gjithashtu e konsiderueshme, pasi Omonia ka marrë pjesë rregullisht në fazat eliminatore të Europa League dhe Conference League.
Sipas faqes së njohur “Transfermarkt”, vlera e skuadrës qipriote arrin në rreth 16.6 milionë euro, çka e bën një kundërshtar dukshëm më të pasur dhe me eksperiencë krahasuar me ekipin kosovar.
Ylli më i madh i Omonias është sulmuesi i njohur Stevan Jovetiq, ish-lojtar i Manchester City, Sevilla dhe Monacos, por pjesëmarrja e tij mbetet në dyshim për shkak të një lëndimi të lehtë muskulor.
Megjithatë, Omonia mbetet një skuadër me lojtarë cilësorë në çdo repart, dhe Drita do të duhet të jetë e kujdesshme në mbrojtje, por edhe e guximshme në sulm, për të përfituar nga mbështetja e publikut vendas.
Atmosfera në Prishtinë pritet të jetë e zjarrtë, me tifozët e Dritës që tashmë kanë treguar se dinë të krijojnë një ambient të veçantë kur skuadra e tyre luan në arenën ndërkombëtare.
Një rezultat pozitiv kundër një ekipi të kalibrit të Omonias do të ishte një tjetër moment historik për klubin gjilanas dhe për futbollin kosovar në përgjithësi. /AutoPortali
