Sezoni 2025 i Formula 1 po i afrohet fundit, duke mbyllur epokën e makinave me efekt tokësor. Ndërsa ekipet përgatiten për ndryshimet e mëdha teknike të vitit 2026, vetëm McLaren, Red Bull dhe Mercedes duken plotësisht të përgatitura për këtë revolucion.

Gjatë katër viteve të fundit, F1 ka ndryshuar rrënjësisht. McLaren dhe Red Bull kanë ndërtuar ekipe të forta, me organizim dhe transparencë, ndërsa skuadrat që kanë fshehur gabimet e tyre kanë mbetur pas.

McLaren, nën drejtimin e Andrea Stella-s, ka vendosur transparencën dhe metodën si shtylla kryesore, duke u rikthyer në majë me dy tituj radhazi. Red Bull, me Laurent Mekies në krye pas largimit të Christian Horner-it, ka ndërtuar një kulturë që pranon gabimet dhe i kthen në përvojë, siç u pa në Brazil, kur skuadra mori rrezikun të ndryshonte konfigurimin e makinës së Verstappen-it për një rikthim spektakolar.

Edhe Mercedes, nën drejtimin e Toto Wolff, mbetet shembull i stabilitetit organizativ dhe i menaxhimit strategjik, pavarësisht vështirësive të epokës së efektit tokësor. Ekipi shihet si një nga favoritët për motorin e ri të vitit 2026.

Në Formula 1, çdo detaj bën diferencën. Vetëm ata që pranojnë dobësitë dhe mësojnë prej tyre do të mbijetojnë në këtë fazë të re. Revolucioni i vitit 2026 do të shpërblejë vizionin, disiplinën dhe guximin për të pranuar gabimet dhe ndoshta do të ndëshkojë ata që ende jetojnë me iluzionin e përsosmërisë.