Mauro Icardi pritet të largohet nga Galatasaray, ndërsa përfaqësuesit e tij po shqyrtojnë seriozisht mundësinë e një rikthimi në Serie A, raportojnë mediat italiane.

Sulmuesi argjentinas, ish-kapiten i Interit, është propozuar te Milan, Como dhe Roma.

Sipas Sportmediaset, përmes Calciomercato, janë realizuar kontaktet e para informative, megjithëse ende nuk ka negociata konkrete, me fokus afatin kalimtar të janarit.

Icardi iu bashkua Galatasaray në sezonin 2022/23, fillimisht në formë huazimi nga Paris Saint-Germain, ndërsa ka kontratë të vlefshme deri në qershor 2026.

Megjithatë, ky sezon pritet të jetë i fundit i tij në Stamboll dhe një largim që në janar nuk përjashtohet.

Roli i tij në skuadër është zvogëluar ndjeshëm për shkak të konkurrencës së fortë në repartin ofensiv.

Prania e Victor Osimhenit dhe Leroy Sanés, si dhe synimi i klubit për të transferuar edhe një sulmues tjetër në janar me Ademola Lookman ende në listën e dëshirave kanë reduktuar minutazhin e argjentinasit.

Këtë sezon, Icardi ka zhvilluar 21 ndeshje në të gjitha garat, por ka grumbulluar vetëm rreth 800 minuta lojë dhe ka startuar në gjashtë takime.

Megjithatë, ai ka qenë efikas, duke shënuar tetë gola në Superligën turke.

Sipas mediave italiane, Icardi po konsideron gjithashtu edhe një transferim në Spanjë.

Mitre Live raporton se ai është monitoruar nga Elche dhe Real Oviedo, ndërsa një kalim në La Liga do të ishte i favorshëm për arsye personale, pasi të dy klubet ofrojnë mundësinë për të jetuar pranë Madridit.

Në përgjithësi, e ardhmja e sulmuesit 30-vjeçar duket e orientuar drejt një rikthimi në Itali ose një aventure të re në futbollin spanjoll. /AutoPortali