Takamoto Katsuta ka deklaruar se qasja e tij për Rally Japan do të jetë shumë e thjeshtë: “sulm total”, me synimin për të arritur një fitore emocionale në garën e shtëpisë.
Piloti japonez i Toyota-s ka vite që kërkon triumfin në Rally Japan, që prej rikthimit të garës në kalendarin e WRC në vitin 2022. Rezultati i tij më i mirë mbetet vendi i tretë në vitin 2022, ndërsa sezonin e kaluar ishte në luftë për fitore deri sa një gabim shkaktoi probleme me drejtimin e makinës.
Këtë sezon, Katsuta po kalon formën më të mirë të karrierës, pasi ka fituar Rally Kenya dhe Rally Croatia. Për këtë arsye, ai ndodhet vetëm 12 pikë pas shokut të skuadrës, Elfyn Evans, në renditjen e kampionatit.
“Nuk ka dyshime, do të sulmoj maksimalisht. Është shumë e thjeshtë. Vitin e kaluar pata vështirësi dhe këtë herë dua të bëj më mirë”, deklaroi Katsuta.
Megjithatë, japonezi pranon se konkurrenca do të jetë shumë e fortë, sidomos brenda skuadrës Toyota. Përveç Evans dhe kampionit Sebastien Ogier, në luftë për fitore priten të jenë edhe Oliver Solberg dhe Sami Pajari.
“Është si të jesh në një skuadër të Formula 1 me Lewis Hamilton, Fernando Alonso dhe Max Verstappen. Nuk është e lehtë t’i mposhtësh, por ky është Kampionati Botëror i Rally”, shtoi Katsuta.
