Tensionet politike në Lindjen e Mesme vazhdojnë të rriten, ndërsa situata e sigurisë ka vënë në alarm edhe institucionet më të larta të futbollit ndërkombëtar.

Organizatorët e Finalissimas, CONMEBOL dhe UEFA, po ndjekin me shqetësim zhvillimet e fundit në Katar.

Sipas raportimeve, raketa të lëshuara nga Irani kanë fluturuar mbi hapësirën ajrore të Katarit në orët e para të mëngjesit, duke ngritur pikëpyetje serioze mbi garantimin e sigurisë për zhvillimin e ndeshjes.

Për këtë arsye, organizatorët kanë nisur të shqyrtojnë alternativa të tjera për zhvillimin e Finalissimas, me synimin që sfida të luhet pavarësisht situatës së tensionuar.

Përveç aspektit financiar, edhe kalendari i ngjeshur i kombëtareve ushtron presion për një vendim të shpejtë, duke qenë se në muajin mars zhvillohen ndeshje të rëndësishme eliminatore, veçanërisht në Evropë dhe Amerikë, në kuadër të kualifikimeve për Kupën e Botës që do të mbahet në Meksikë.

Aktualisht, dy qytete konsiderohen si alternativat më të mundshme për të zëvendësuar Katarin: Londra dhe Miami.

Londra paraqet avantazhe të dukshme në aspektin e sigurisë dhe logjistikës.

Anglia shihet si një vend i qëndrueshëm, ndërsa shumica e lojtarëve të Argjentinës dhe Spanjës aktivizohen në kampionatet evropiane, çka do ta lehtësonte organizimin.

Kryeqyteti anglez ka edhe një vlerë simbolike për argjentinasit, pasi aty u zhvillua edicioni i parë i Finalissima në vitin 2022, kur Argjentina mposhti Italinë 3-0 dhe Lionel Messi ngriti trofeun.

Nga këndvështrimi i tifozëve, Londra konsiderohet një zgjedhje ideale, duke pasur parasysh praninë e madhe të komuniteteve në Evropë.

Nga ana tjetër, Miami ofron eksperiencë në organizimin e eventeve madhore sportive.

Hard Rock Stadium është planifikuar të presë shtatë ndeshje të Kupës së Botës dhe ka organizuar edhe finalen e Copa América 2024, duke dëshmuar kapacitet organizativ.

Megjithatë, ekzistojnë disa shqetësime lidhur me opsionin amerikan.

Distanca e konsiderueshme do të kërkonte udhëtime të gjata për ekipet, ndërsa fakti që ndeshja do të zhvillohej në një nga vendet e përfshira në tensionet aktuale shton elementin e pasigurisë.

Për momentin, Katari nuk është përjashtuar zyrtarisht si organizator, por është e qartë se alternativat po analizohen seriozisht nga instancat përkatëse.

Vendimi përfundimtar pritet të merret në varësi të zhvillimeve të sigurisë në rajon dhe garancive që mund të ofrohen në ditët në vijim./ AutoPortali