Instituti i Sigurimeve për Sigurinë në Autostrada (IIHS) dhe Instituti i të Dhënave për Humbjet në Autostrada (HLDI) kanë publikuar listën e përditësuar të 20 automjeteve më të vjedhura në SHBA. Në krye të listës është Chevrolet Camaro ZL1, që ka një shkallë vjedhjeje 39 herë më të lartë se mesatarja, ndërsa modelet standarde të Camaro-s janë të tretat me 13 herë më shumë rrezik.

Pavarësisht se Camaro u ndërpre në fund të vitit 2024, modeli ZL1, i pajisur me motor V8 6.2-litërsh me 650 kuaj/fuqi, mbetet shumë i kërkuar — jo vetëm nga entuziastët, por edhe nga hajdutët. Modelet e gjeneratës së gjashtë (2016 e tutje) rezultojnë veçanërisht të cenueshme për shkak të sistemeve të avancuara që mund të manipulohen lehtësisht. HLDI vëren se hajdutët arrijnë të klonojnë çelësin përmes portave të integruara që përdoren nga teknikët për diagnostikim, shkruan Thederiver, transmeton AutoPortali.

Që nga viti 2023, vjedhjet e Camaro-s u rritën ndjeshëm dhe kulmuan në mars 2024, ku për çdo 1,000 makina të siguruara ndodheshin 18.3 kërkesa për vjedhje, krahasuar me vetëm 1.3 për modelet 2010-2015. Hulumtimi sugjeron se futja e sistemit të ndezjes me buton që nga viti 2016 është një nga arsyet kryesore.

Ndërkohë, automjetet Kia dhe Hyundai, të cilat më parë ishin shpesh në krye të listës për shkak të dobësive në siguri, duket se janë stabilizuar pas përditësimeve të fundit.

Megjithëse Camaro ZL1 është një zgjedhje “logjike” për vjedhje për shkak të fuqisë dhe vlerës së saj, mungesa e modeleve si Dodge Charger dhe Challenger në listën më të re është e papritur, duke pasur parasysh përhapjen e madhe dhe reputacionin e tyre për rrezik vjedhjeje. Por lista bazohet në raportin e vjedhjeve për njësi në qarkullim, jo në shifra të përgjithshme.