Max Verstappen fitoi për të katërtën herë radhazi në pistën legjendare të Imolës këtë fundjavë, por vitin e ardhshëm mund të jetë hera e fundit që kjo garë zhvillohet. Formula 1 pritet të heqë pistën italiane nga kalendari pas vitit 2025, për shkak të mungesës së kontratës për vitin 2026 dhe kërkesave në rritje nga vende të tjera.

Shefi ekzekutiv i F1, Stefano Domenicali, ka pranuar se është e vështirë të justifikohet mbajtja e dy garave në Itali – Monza tashmë ka kontratë deri në vitin 2031.

Vetë Verstappen, ndonëse e kupton arsyen financiare, shprehu keqardhjen për këtë vendim.

“Është për të ardhur keq të humbasim pista të tilla. Këto janë vendet që më bënë të dashurohem me garat”, tha ai pas fitores në Çmimin e Madh të Emilia-Romagna.

Formula 1 do të shtojë Madridin në kalendarin e vitit 2026, ndërsa kërkesat për gara të reja nga vende si Afrika, Tajlanda dhe Kina janë në rritje. Në këtë sfond, pista tradicionale e Imolës, e ngushtë dhe me histori të thellë, rrezikon të mbetet jashtë.