Debati për sulmuesit më të mire duket se nuk ka fund dhe në këtë temë së fundi është deklaruar edhe ish-sulmuesi legjendar i Manchester Unitedit, Andy Cole. Ai  zgjodhi tre sulmuesit më të mirë të ditëve të sotme në një intervistë për ESPN dhe “tronditi” me zgjedhjen e tij.

Ish-anëtarit të Përfaqësueses angleze iu drejtua pyetja: “Cilët janë sulmuesit më të mirë sot?”, dhe, megjithëse të gjithë prisnin që të paktën një nga treshja Kylian Mbappe, Erling Haaland dhe Harry Kane të ishte mes tyre, Cole zgjodhi tre veteranë.

“Robert Lewandowski, Karim Benzema dhe ndoshta Cristiano Ronaldo. Trajnerët ndryshojnë, por ata i kanë përmirësuar ndeshjet e tyre”, ka thënë Cole.

Pas kësaj deklarate, nuk është çudi që njerëzit në rrjetet sociale filluan të pyesin nëse Cole e ndjek futbollin kur la jashtë emra si Mbappe, Haaland apo Kane.

Ndryshe, në mesin dhe fundin e viteve 1990, Cole dhe Dwight Yorke formuan tandemin sulmues vdekjeprurës të Manchester United, dhe në 275 ndeshje për “Djajtë e Kuq”, ai shënoi 121 gola dhe fitoi pesë tituj të Ligës Premiere, dy Kupa FA dhe një Ligë të Kampionëve.