Polaku Miko Marczyk është shpallur kampioni i ri i Kampionatit Evropian të Rallyt (ERC) nën ombrellën e FIA-s, duke siguruar titullin për vitin 2025 me vendin e tretë në një garë dramatike në Croatia Rally.

Fitues i garës ishte irlandezi Jon Armstrong me ekipin M-Sport Ford, ndërsa veterani norvegjez Mads Ostberg arriti vendin e dytë në garën e tij të 300-të në karrierë.

Festa ishte edhe për ekipin Team MRF Tyres, që fitoi titullin ekipor në ERC, ndërsa Tymek Abramowski dhe Calle Carlberg fituan në kategoritë ERC3 dhe ERC4.

Dita e fundit e garës u zhvillua në kushte shumë të vështira për shkak të shiut të dendur, që e bëri pistën tepër të rrëshqitshme. Marczyk, i cili ishte i gjashti të shtunën, garoi me kujdes dhe shpejtësi të dielën. Ndërkohë, rivalët e tij kryesorë, Mille Johansson, Norbert Maior dhe Robert Virves  u përplasën ose humbën shumë kohë, duke i hapur rrugën polakut drejt vendit të tretë që i garantoi titullin.

Armstrong dominoi garën, duke fituar pesë nga gjashtë etapat e së shtunës dhe gjithashtu Power Stage-in përmbyllës. Megjithatë, edhe pse fitoi maksimumin e pikëve, nuk arriti ta parakalojë Marczyk në renditjen e përgjithshme.