Shefi i Mercedesit, Toto Wolff, ka deklaruar se do të ishte i zhgënjyer nëse vendimet e FIA për sistemin ADUO (mundësitë shtesë për zhvillim dhe përditësim) do të ndikonin në renditjen e Formula 1.

Sipas tij, ky mekanizëm është krijuar për të ndihmuar prodhuesit që janë prapa të afrohen me rivalët, jo për t’i kaluar ata. Ai thekson se çdo vendim duhet të merret me transparencë dhe saktësi, pasi mund të ndikojë drejtpërdrejt në kampionat.

“Duhet të jetë e qartë se nuk ka vend për lojëra taktike”, u shpreh Wolff, duke shtuar se ADUO duhet të përdoret vetëm si një mjet për të barazuar garën, jo për të ndryshuar balancat në mënyrë artificiale.

Ai la të kuptohet se vetëm një prodhues motorësh ka realisht nevojë për ndihmë, ndërsa të tjerët janë në nivele të ngjashme, ndaj çdo ndërhyrje e gabuar mund të prishë ekuilibrin aktual të konkurrencës.