Përkujdesja dhe mirëmbajtja e rregullt e automjetit janë kyçe për funksionimin e sigurt dhe jetëgjatësinë e motorit, transmisionit dhe komponentëve të tjerë mekanikë. Një nga aspektet më të rëndësishme të mirëmbajtjes është ndërrimi periodik i vajit, pasi me kalimin e kohës dhe përdorimin, ai humbet vetitë lubrifikuese dhe nuk ofron më mbrojtjen e duhur për pjesët e lëvizshme të motorit.

Edhe nëse makina nuk përdoret shpesh, rreziqet nuk zhduken. Përkundrazi, mungesa e përdorimit të rregullt mund të shkaktojë më shumë dëme mekanike sesa një përdorim normal. Ciklet e ngrohjes dhe lëvizja e vazhdueshme e motorit ndihmojnë që tubat, guarnicionet dhe rripat – shumica të prodhuara nga goma – të mbeten fleksibël dhe funksionalë. Në mungesë të këtyre cikleve, këto pjesë fillojnë të thahen, ngurtësohen dhe të çahen, duke rritur ndjeshëm rrezikun e rrjedhjeve ose defekteve serioze.

Kjo është veçanërisht e rrezikshme në rastet kur bëhet fjalë për rripat e kohës, të cilët nëse pësojnë thyerje, mund të sjellin dëmtime të rënda në motor. Po ashtu, komponentët e pezullimit, të cilët përmbajnë pjesë gome, me kohë fillojnë të degradojnë nëse makina qëndron për periudha të gjata pa lëvizur. Kjo shpesh shoqërohet me zhurma të pakëndshme gjatë ngasjes dhe ndikon drejtpërdrejt në sigurinë e automjetit.

Ekspertët e servisimit rekomandojnë kontrolle dhe mirëmbajtje të rregullta, pavarësisht sa shpesh ngisni makinën, për të parandaluar dëmet e fshehura dhe për të siguruar një performancë të qëndrueshme dhe të sigurt në rrugë.