Toprak Razgatlioglu ka pranuar se sezoni 2026 mund të jetë një vit mësimi për të në MotoGP, duke mos përjashtuar mundësinë që të mos arrijë asnjë podium në vitin e tij debutues.

Piloti turk i Pramac Racing, një nga transferimet më të bujshme në klasën mbretërore pas fitimit të tre titujve në World Superbike në pesë vitet e fundit, përballet me një sfidë të madhe në përshtatjen me MotoGP. Yamaha M1 me motor V4 përfaqëson një hap të madh krahasuar me BMW M1000R që ai ngiste në WSBK.

Ndërsa menaxheri i tij, Kenan Sofuoglu, ka deklaruar se objektivi është rivaliteti me Fabio Quartararo brenda Yamaha-s, vetë Razgatlioglu mbetet realist. Ai tha se lufta për podium mund të vijë vetëm në 2027, pas rregullave të reja.

“2026 ndoshta është viti i të mësuarit për mua. Duhet të përshtatem me motorin dhe të mësoj disa pista. Do të jap maksimumin, si gjithmonë,” u shpreh ai.

Një nga sfidat kryesore do të jetë kalimi nga Pirelli te Michelin, me menaxhimin e gomave që luan rol kyç në MotoGP. Razgatlioglu ka testuar motorin MotoGP në Aragon dhe Valencia në fund të 2025-ës dhe u shpreh i impresionuar nga përshpejtimi dhe shpejtësia në vijë të drejtë e Yamaha M1.

“Është një motor krejtësisht ndryshe. Përshpejtimi është i jashtëzakonshëm, por më duhet kohë për t’u përshtatur dhe për të kuptuar limitet, sidomos me gomat,” përfundoi ai.