Gara Virtuale në Circuitin e Valencias solli spektakël dhe dramë
Sezoni 2025 i garave virtuale GT3, organizuar nga Sim Race Kosova, nisi me vrull, në pistën legjendare të Valencias, duke sjellë një garë të mbushur me intensitet, strategji dhe kthesa të papritura. Nëntë garues morën pjesë në këtë hapje emocionuese të kampionatit.
Që nga nisja, Drilon Ahmetaj dominoi garën, duke udhëhequr nga fillimi deri në fund me një paraqitje perfekte, dhe duke siguruar vendin e parë. Ritmi i tij, qëndrueshmëria dhe qetësia në presion ishin shembullore, një sinjal i qartë se ai është pretendent për titull këtë sezon.
Në vendin e dytë u rendit Allmir Suhodolli, i cili zhvilloi një garë të fortë dhe konsistente, duke përfituar nga zhvillimet në mes të garës për të siguruar një podium të merituar.
Rion Tytynxhiu, një i ri me talent premtues, impresionoi me një paraqitje të pjekur dhe arriti vendin e tretë në debutimin e tij në disiplinën GT3.
Fatkeqësisht, Agis Kaquri dhe Baran Karabeg patën një ditë të vështirë. Kaquri, që nisi nga vendi i dytë, humbi podiumin për shkak të gabimeve në ndalesën në bokse dhe përfundoi i katërti. Karabeg gjithashtu pati probleme dhe përfundoi në vendin e pestë.
Kampioni i vitit 2023, Genc Macula, zhvilloi një garë të qetë dhe u rendit i gjashti, ndërsa Blend Ferizi përfundoi në vendin e shtatë. Jetmir Kojqiqi dhe Visar Gjikolli nuk arritën të përfundonin garën për shkak të problemeve teknike dhe incidenteve gjatë garës.
Kjo garë e parë tregoi qartë se sezoni GT3 2025 do të jetë jashtëzakonisht emocionues. Gara e radhës pritet me padurim dhe do te mbahet ne Nurburgring me daten 04/06/25, ndërsa disa pilotë do të kërkojnë rikthim, dhe të tjerë do të përpiqen të ruajnë momentumin.
