Carlos Sainz ka fituar apelin për penalizimin që mori në Çmimin e Madh të Holandës pas një kontakti me Liam Lawson, një vendim që ai e konsideron si një fitore të vogël, por me domethënie.

Piloti i Williams, në prag të garës në Baku, theksoi se është hera e parë që një apel i tij pranohet falë provave të reja dhe se kjo tregon se “sistemi mund të funksionojë”.

Si një nga drejtuesit e Shoqatës së Pilotëve të F1 (GPDA), Sainz kërkon ndryshime më të mëdha për të rritur drejtësinë në vendimet për incidentet në pistë:

“Duhet të kemi të paktën dy komisarë të përhershëm dhe një të tretë që të ndryshojë, kjo për të ruajtur ‘fair play’-n dhe për arsye edukative”, tha ai për mediat në Baku.

Megjithatë, pengesë kryesore është kostoja për të paguar dy komisarë profesionistë në mënyrë të përhershme. Sainz e hodhi poshtë këtë si një shqetësim të pavend:

“Ka mjaft para në këtë sport për të paguar njerëzit që marrin vendime të rëndësishme. Nuk mund të jetë kjo arsyeja që pengon drejtësinë”.

Sipas tij, udhëzimet aktuale për incidentet në pistë janë të paqarta, edhe pse në letër duken të sakta.