Piloti i Mercedesit, George Russell, fitoi garën e Formula 1 për Çmimin e Madh të Singaporit, duke siguruar fitoren e tij të dytë këtë sezon dhe të pestën në karrierë. Ai nisi nga “pole position” dhe udhëhoqi gjatë gjithë garës.

“Ndjesi e jashtëzakonshme. Ekipi bëri një punë të shkëlqyer. Nuk e dimë nga doli kjo paraqitje, por jemi shumë të lumtur”, tha Russell. Ai pranoi se ishte nervoz kur pa që Verstappen ishte me goma të buta, por e menaxhoi mirë pjesën e parë të garës.

Max Verstappen i Red Bull përfundoi i dyti dhe tha se gara ishte shumë e vështirë për të. “Pista ishte e vështirë për parakalime. Vendin e dytë e shoh si maksimumin e mundshëm”, tha ai.

Lando Norris i McLaren zuri vendin e tretë, pavarësisht një kontakti në fillim me Verstappenin dhe shokun e skuadrës, Piastri. “Ishte një garë e fortë dhe e rrëshqitshme, por jam i kënaqur me rezultatin,” u shpreh Norris.

Në renditjen e përgjithshme, Piastri kryeson me 336 pikë, ndjekur nga Norris me 314 dhe Verstappen me 273. McLaren siguroi titullin për konstruktorët me 650 pikë, para Mercedesit dhe Ferrarit.

Kampionati vazhdon më 19 tetor në Austin, SHBA.