Kapiteni i Kosovës, Amir Rrahmani, do t’i mungojë Kombëtares në ndeshjet vendimtare të muajit mars për kualifikimet në Kupën e Botës, duke paraqitur një goditje të madhe për Dardanët në një moment kyç të ciklit eliminator.

Mbrojtësi qendror nuk do të jetë i gatshëm për sfidën ndaj Sllovakia, pas lëndimit të pësuar në fundjavë gjatë përballjes në Serie A mes SSC Napoli dhe AS Roma.

Rrahmani u detyrua të largohej nga loja pas shqetësimeve muskulore, duke ngritur menjëherë dyshime për një dëmtim serioz.

Sipas raportimeve nga mediat italiane, qendërmbrojtësi pritet të qëndrojë jashtë fushave për disa muaj, çka e përjashton jo vetëm nga ndeshjet e marsit me Kosovën, por edhe nga një pjesë e rëndësishme e sezonit me klubin e tij.

Napoli ka konfirmuar zyrtarisht se lojtari ka kryer ekzaminimet mjekësore në spitalin “Pineta Grande”, ku testet kanë zbuluar një lezion të gradës së lartë në biceps femoris të kofshës së majtë.

Ky lloj dëmtimi konsiderohet serioz dhe kërkon kohë të gjatë rikuperimi, varësisht nga reagimi i lojtarit ndaj trajtimit dhe rehabilitimit.

Në këtë mënyrë, Rrahmani përballet me një periudhë të vështirë rikuperimi, ndërsa Kosova do të duhet të gjejë alternativa në repartin defensiv për ndeshjen e rëndësishme ndaj Sllovakisë. /AutoPortali