Ott Tanak bëri një rikthim të suksesshëm në garat e rally-t, duke fituar debutimin e tij në kampionatin kombëtar të American Rally Association (ARA) në Overmountain Rally Tennessee.
Kampioni i botës në rally për vitin 2019 drejtoi një Toyota GR Corolla Rally RC2, në garën me zhavorr, në paraqitjen e tij të parë konkurruese që nga gara e fundit e sezonit 2025 të WRC-së në Arabinë Saudite.
Tanak dhe bashkëdrejtuesi Martin Jarveoja fituan garën me 13 etapa, duke mposhtur me 1 minutë e 4,3 sekonda kanadezin Brandon Semenuk. Kjo ishte fitorja e parë e Tanak me Toyota-n që nga Rally Catalunya në vitin 2019.
Pas largimit nga ekipi Hyundai në fund të vitit 2025, Tänak iu bashkua Toyota-s këtë sezon si pilot testues dhe zhvillues. Ai ka punuar intensivisht në zhvillimin e makinës së re Toyota për WRC 2027, e cila do të përgatitet për ndryshimet e mëdha në rregulloret teknike.
Në Tennessee, Tanak fitoi 10 nga etapat speciale, duke marrë kontrollin e garës që nga dita e parë. Pas tij u rendit Semenuk, ndërsa vendin e tretë e zuri Seth Quintero me një tjetër Toyota GR Corolla RC2.
Pjesëmarrja e Tanak në këtë rally kishte edhe një qëllim testues, pasi rajoni është pjesë e përpjekjeve për rikthimin e WRC-së në SHBA në vitin 2027.
Ende nuk dihet se kur Tanak do të rikthehet në garat e ardhshme, por pritet që ai të vazhdojë gjatë këtij viti punën për zhvillimin e Toyota-s për sezonin 2027.
