Piloti britanik i Mercedes, George Russell, duket se ka fituar një vetëbesim të madh pas fitores së tij dominuese në Baku dhe synon ta rihapë betejën për titullin kampion në Formula 1. Deri pak javë më parë, ai përsëriste se nuk po mendonte më për renditjen e kampionatit dhe se donte të përqendrohej vetëm te fitoret individuale në gara.

Ai e konsideronte diferencën prej 81 pikësh me shokun e skuadrës Kimi Antonelli, praktikisht të pakapërcyeshme. Megjithatë, fitorja dominuese në Baku, kombinuar me vështirësitë e pilotit italian në kualifikuese, të cilat bënë që ai të mos renditej më lart se vendi i pestë në garë, duket se i ka rikthyer shpresat e mëdha pilotit të Mercedes.

“Më parë, nuk ndihesha i aftë të luftoja për fitore sepse nuk i konsideroja performancat e mia mjaftueshëm solide. Tani ndihem në gjendje të konkurroj për fitore garë pas gare. Sigurisht, diferenca është e konsiderueshme (66 pikë), por kemi kaluar vetëm dy të tretat e sezonit, ka mbetur ende një e treta e kampionatit dhe gjithçka mund të ndodhë”, tha Russell.

“Do ta marr situatën garë pas gare. Kohët e fundit po argëtohem më shumë sepse ndihem më në harmoni me makinën. Shpresoj që kjo paketë e re përmirësimesh të funksionojë më shumë në favorin tim. Jam gati për sfidën,” shtoi piloti britanik i Mercedes.