Pas përfundimit të fazës së grupeve në FIBA U20 Kampionatin Evropian, Divizioni B, janë përcaktuar çiftet e çerekfinaleve, ku Kosova U20 ka arritur një sukses historik duke depërtuar për herë të parë në mesin e tetë skuadrave më të mira të këtij turneu.

Në Grupin D, Dardanët e rinj treguan një formë shumë të mirë, duke regjistruar tri fitore dhe vetëm një humbje, transmeton Autoportali.

Pas tre fitoreve radhazi ndaj Suedisë, Shqipërisë dhe Hungarisë, Kosova u mund vetëm nga Turqia, që përfundoi në vendin e parë në grup.

Kjo paraqitje e shkëlqyer i dha Kosovës vendin e dytë dhe biletën për në fazën eliminatore të çerekfinales.

Në këtë fazë, Kosova do të përballet me Zvicrën, që u rendit e para në Grupin C. Megjithëse edhe Zvicra regjistroi tri fitore dhe dy humbje, ajo u dallua për koshdallimin më të mirë, duke lënë pas Holanda, Austria dhe Danimarka, skuadra që kishin të njëjtin bilanc fitore-humbje.

Ky duel pritet të jetë shumë i fortë dhe me emocione, ndërsa ora dhe data e saktë e ndeshjes do të njoftohen më vonë.

Fituesi i kësaj ndeshjeje do të përballet në gjysmëfinale me fituesin e takimit mes Letonisë dhe Britanisë së Madhe, një tjetër duel që premton të jetë shumë konkurrues.

Ky sukses për Kosovën U20 është një arritje historike dhe përfaqëson përparimin më të madh deri tani në garat ndërkombëtare të basketbollit për këtë grupmoshë.

Ai dëshmon punën e vazhdueshme të trajnerëve dhe lojtarëve të rinj, si dhe rritjen e nivelit të basketbollit në vend.

Me këtë formë, pritet që Dardanët e rinj të jenë një faktor serioz në kampionatin evropian dhe të vazhdojnë të sjellin rezultate pozitive në të ardhmen. /AutoPortali