Ferrari ka zbuluar zyrtarisht modelin më të ri të gamës së markës së tij, që pritet të jetë pasardhësi i Roma-s. I quajtur Amalfi, ky është një coupe elegant me motor në pjesën e përparme dhe me katër vende, që vjen me një dizajn të rifreskuar, por duke ruajtur fuqinë e njohur të motorit V8 me dy turbo, transmeton AutoPortali.

Dizajn i frymëzuar, me prekje moderne 

Siç shkruan Motor1, nga pamja e jashtme, Amalfi është një evoluim natyral i Roma-s, me përmasa thuajse identike: kofano të gjatë, formë të theksuar të pjesës së pasme dhe një hundë të mprehtë, tipike për modelet e fundit të Ferrari-t. Frymëzimi nga modeli SF90 dhe 12Cilindri është i dukshëm, veçanërisht në pjesën e përparme ku spikat dizajni i ri “sharknose”, me një shirit të zi që lidh dy fenerët e hollë. Edhe pjesa e pasme mbetet karakteristike, me katër drita të ndara të frenimit, tani të lidhura me një element të zi dekorativ.Kabinë më praktike: Fundi i butonave “touch”

Ndryshimi më i madh ndodh në brendësi: Ferrari ka dëgjuar ankesat e klientëve dhe ka hequr butonat me prekje të vështira për t’u përdorur në timon, duke i zëvendësuar me kontrolle fizike. Edhe butoni i ndezjes, që më parë ishte “touch”, tani është bërë një buton tradicional prej titani, i pozicionuar në anën e majtë të timonit.

Më shumë fuqi, falë përmirësimeve të motorit

Nën kofano gjendet motori i njohur V8 3.8-litërsh me dy turbo, që tani prodhon 631 kuaj fuqi, 19 më shumë se Roma. Çifti mbetet i pandryshuar në 761 Nm, ndërsa shpejtësia nga 0 në 100 km/h arrihet për vetëm 3.3 sekonda, me një shpejtësi maksimale prej 319 km/h. Përmirësimi i performancës vjen falë boshtave të rinj më të lehtë, një bllok motorik të përpunuar me më shumë precizion, vaj me viskozitet më të ulët dhe kalibrim të ri të turbokompresorëve.

Teknologji dhe aerodinamikë më e avancuar

Ferrari Amalfi sjell edhe teknologji të re: sistemi i frenimit “brake-by-wire” i huazuar nga modelet 296 GTB dhe 12Cilindri, si dhe një spoiler aktiv në pjesën e pasme që rrit stabilitetin në shpejtësi të larta, duke prodhuar deri në 110 kg forcë shtytëse në 250 km/h.

Sistemi i ri Side Slip Control 6.1 menaxhon çdo aspekt të dinamikës së makinës – nga këndi i timonit, te lëvizjet e pezullimit dhe deri te kontrolli i tërheqjes. Siguria nuk është lënë pas dore: Amalfi vjen me paketën e plotë të sistemeve të asistencës për shoferin, përfshirë kontrollin aktiv të shpejtësisë, frenimin emergjent automatik, paralajmërimin e daljes nga korsia dhe më shumë.Çmimi dhe pritshmëritë

Edhe pse Ferrari nuk ka njoftuar ende datën e saktë të nisjes së shpërndarjeve, pritet që Amalfi të dalë nga linjat e prodhimit para fundit të këtij viti. Për ata që preferojnë versionin cabrio, një variant Spider duket se është në horizont, pasi Ferrari ka regjistruar emrin Amalfi Spider që vitin e kaluar.

Sa për çmimin? Me Roma-n që e mbylli prodhimin me një çmim fillestar rreth 247 mijë dollarë, nuk përjashtohet mundësia që Amalfi të nisë nga mbi 300 mijë dollarë, duke marrë parasysh inflacionin dhe tarifat doganore. /AutoPortali