Qendra Kombëtare për Menaxhim Kufitar në Kosovë ka paralajmëruar qytetarët, veçanërisht mërgimtarët, për mundësi të mëdha bllokimesh në rrugët e Kroacisë gjatë fundjavës.

Më 5 korrik 2025, në Zagreb do të mbahet një koncert masiv në ajër të hapur, ku pritet të marrin pjesë rreth 500 mijë vizitorë. Si pasojë, priten pengesa të mëdha në qarkullim jo vetëm në kryeqytetin kroat, por edhe në autostradat kryesore që të çojnë drejt tij.

Rrugët më të rrezikuara për ngarkesë do të jenë:

Autostradat A2, A3, A4 që lidhen me Zagrebin,

Autostradat A1 dhe A6 nga jugu drejt kryeqytetit,

Rruga anësore e Zagrebit.

Autoritetet kroate njoftojnë se trafiku do të jetë veçanërisht i ngarkuar nga data 4 deri më 6 korrik, me kulmin gjatë natës së së shtunës.

Për shkak të masave të përkohshme të menaxhimit të trafikut, do të ketë edhe bllokime të përkohshme rrugësh brenda qytetit.

Qytetarëve u rekomandohet të planifikojnë udhëtimin para datës 5 korrik ose ta shtyjnë pas kësaj periudhe dhe të ndjekin përditësimet zyrtare të trafikut në Programin e Dytë të Radios Kroate, si dhe në faqet dhe aplikacionet e Klubit Kroat të Automobilave (HAK).