Mazda po përgatitet të sjellë në treg gjeneratën e tretë të SUV-it më të shitur, CX-5, një model që prej vitesh përbën gjysmën e shitjeve të kompanisë në SHBA – rreth 150 mijë njësi në vit. Edhe pse shitjet kanë shënuar rënie që nga viti 2021, CX-5 mbetet “patësja e artë” e Mazdës, prandaj ndryshimet për vitin 2026 janë bërë me kujdes të veçantë. Slogani i brendshëm ishte i qartë: “Mos e prishni!”

Mazda e quan modelin “krejtësisht të ri”, por të dhënat e deritanishme sugjerojnë më shumë një përditësim të thellë sesa një revolucion, shkruan AutoWeek.Motor i njëjtë, përmasa më të mëdha

CX-5 i vitit 2026 do të vijë me të njëjtin motor bazë si modeli aktual – një 2.5-litër atmosferik me katër cilindra, i cili tani prodhon 187 kuaj fuqi (një më shumë se më parë) dhe 185 lb-ft çift rrotullues (një më pak). Ky motor do të kombinohet me një transmision automatik me 6 shpejtësi dhe sistemin AWD i-Activ, që vjen standard.

Nuk u përmend nëse do të vazhdojë të ofrohet versioni më i fuqishëm me turbo 2.5-litër, që aktualisht prodhon 256 kuaj fuqi dhe 320 lb-ft me benzinë premium. Mazda gjithashtu konfirmoi se një version hibrid pritet të dalë në vitin 2027, por pa dhënë detaje shtesë. Mbetet e paqartë nëse ai do ta zëvendësojë motorin turbo, transmeton AutoPortali.

Dizajn i jashtëm i ri: “Kodo” në evoluim

Mazda ka përditësuar edhe dizajnin e jashtëm sipas filozofisë së njohur “Kodo Design”, tani me një qasje të re që kompania e quan “Wearable Gear”, e frymëzuar nga veshje funksionale dhe elegante.

“Qasja e re e dizajnit synon të ruajë siluetën karakteristike të CX-5, duke përmirësuar përmasat për një kabinë më të gjerë dhe pamje më të fuqishme në rrugë”, thuhet në njoftimin e kompanisë.

Pamja e përparme është më e mprehtë, me grilën karakteristike të Mazdës, ndërsa dritat e pasme janë më këndore, në harmoni me stilin e modeleve më të reja si CX-70 dhe CX-90.

 Më shumë hapësirë dhe teknologji brenda

CX-5 i ri do të jetë 4.5 inç më i gjatë, me një bazë rrotash 3 inç më të gjatë, dhe gati 1 inç më i gjerë. Kjo do të thotë më shumë hapësirë për pasagjerët në rreshtin e dytë, si dhe një bagazh dukshëm më funksional.

Në kabinë, vjen një ekran opsional 15.6 inç me sistemin Google Built-In, që përfshin Google Assistant, Google Maps dhe Google Play Store.

CX-5 u prezantua për herë të parë në vitin 2012 si zëvendësues i modelit Mazda Tribute dhe u ridizajnua në vitin 2017. Me modelin 2026, hyn në gjeneratën e tretë, e cila do të mbërrijë në sallonet e shitjes në fillim të vitit të ardhshëm.

Ky model ishte i pari që prezantoi teknologjinë SkyActiv, një platformë që i dha Mazdës një avantazh në efikasitetin mekanik përballë konkurrentëve.

Megjithatë, përveç përmasave më të mëdha dhe teknologjisë së re, mungesa e përmirësimeve në motor, pezullim, drejtim dhe frenim ngre pikëpyetje nëse ky është një model i ri apo thjesht një rifreskim në mes të ciklit jetësor. /AutoPortali