Dy nga makinat më të fuqishme amerikane përballen kokë më kokë në një garë brutale shpejtësie: supermakina me benzinë Chevy Corvette ZR1 kundër bishës elektrike Tesla Model S Plaid. Një duel klasik mes fuqisë së papërmbajtur të motorëve me djegie dhe momentit të menjëhershëm të teknologjisë elektrike, kush del fitues në vijën e drejtë dhe kush dominon pistën?
Model S Plaid është jashtëzakonisht i shpejtë në pistën e drejtë, por Corvette ZR1 është ndërtuar për kthesat e pistës së garave.
Supermakina amerikane kundër EV-së super të fuqishme të Musk
Chevrolet Corvette ZR1 C8 nuk është thjesht një tjetër Corvette me fuqi të lartë – është versioni më i fuqishëm i prodhuar ndonjëherë për rrugë. Të paktën deri sa të arrijë në duart e pronarëve versioni i elektrifikuar ZR1X, shkruan AutoBlog.
Me 1,064 kuaj fuqi nga një motor V8 5.5 litra twin-turbo dhe me një shpejtësi maksimale prej 375 km/h, ZR1 tashmë ka lënë gjurmë në disa nga pistat më të vështira në SHBA, duke thyer rekorde për makina prodhimi në Watkins Glen, Road Atlanta, VIR dhe Road America.
Edhe në gara drag, ZR1 ka lënë pas dy nga hypermakinat më të shpejta italiane: Lamborghini Revuelto dhe Ferrari SF90 Stradale, transmeton AutoPortali.
Por në epokën e çift-rrotullimit të menjëhershëm dhe kapjes së rrugës përmes sistemit AWD, ekziston një “elefant në dhomë”: Tesla Model S Plaid. Me çerek-mile më pak se 10 sekonda dhe një nisje brutale e heshtur, Plaid po shkruan nga e para librin e shpejtësisë në vijë të drejtë.
Por a mundet armiku më i ri i Chevrolet të përballet me Model S Plaid në pistë drag?
Përballja në shifra: Corvette ZR1 vs Tesla Model S Plaid
ZR1 dhe Plaid janë dy bisha krejtësisht të ndryshme në letër. Corvette është ndërtuar për kohë rekord në pistë, me aerodinamikë që e mban ngjitur në kthesat e shpejta. Ndërkohë, Tesla është një sedan luksoz elektrik me përshpejtim tronditës dhe shpërndarje momentale të fuqisë.
Në garën drag, Corvette ZR1 arriti çerek-milen më të mirë në 9.86 sekonda me 226.7 km/h, një nisje prej 1.57 sekonda dhe një reagim gati perfekt prej 0.075 sekonda.
Nga ana tjetër, Tesla Model S Plaid përfundoi çerek-milen në vetëm 9.24 sekonda me 242.3 km/h, duke kapur 60 këmbët e para për vetëm 1.48 sekonda. Koha në 1/8 e milës ishte 5.99 sekonda me 196 km/h dhe vazhdoi të përshpejtojë. Tesla kishte më shumë kapje në çdo fazë falë sistemit AWD dhe fuqisë elektrike të menjëhershme. Pa turbo, pa ndërrime marsi vetëm përshpejtim i egër dhe i pandërprerë.
Por pista është tjetër histori
Në vijë të drejtë, Tesla Model S Plaid është fituesi i qartë. Niset më shpejt, arrin çdo pikë më shpejt dhe nuk ka nevojë për kushte perfekte. Corvette ZR1, edhe pse ka fuqi të jashtëzakonshme, nuk mundi të përballojë Teslën në vijë të drejtë – veçanërisht me paketën aerodinamike ZTK, e cila shton shumë forcë poshtë (dhe rezistencë ajri).
Por le ta themi troç: ZR1 nuk është ndërtuar për gara semafori. Është një makinë piste në çdo milimetër të saj. Dyshojmë që Model S Plaid mund të matet me Corvette ZR1 për sa i përket kohëve të xhirove në pistë – veçanërisht në sesione të përsëritura dhe intensive. /AutoPortali
