Velipoja e kësaj vere shpalos një peizazh krejt tjetër të hapësirave të shtuara publike, respektimit të distancave, rregullit dhe sinjalistikës së sigurisë.

Ministrja e Turizmit dhe Mjedisit, Mirela Kumbaro u shpreh se kjo e bën këtë vijë bregdetare një zgjedhje të preferuar për pushuesit e huaj, vendas dhe shqiptarët e Kosovës që janë besnikët e saj të përvitshëm.

Kumbaro ndau opinione të turistëve që kanë zgjedhur Velipojën, të cilët vlerësojnë hapësirat publike, pastërtinë si dhe sigurinë detare, shkruan Agjencia Telegrafike e Shqipërisë, përcjell AutoPortali.

“Çdo 200 metra linearë ka plazhe publike. Kemi mundësi zgjedhjeje”, u shpreh një turist.

Velipoja konsiderohet një nga plazhet ranore me shtrirjen më të gjerë në Shqipëri dhe vazhdon të jetë një ndër destinacionet më të frekuentuara nga turistët vendas dhe të huaj gjatë sezonit veror.

Me mbi 14 kilometra vijë bregdetare, Velipoja ofron një ndërthurje të rrallë mes detit, lumit, deltës me ishuj, kodrave, pyllit, lagunës dhe fushave, që e bëjnë atë tërheqëse për vizitorët në çdo stinë.

Shtimi i hapësirave publike dhe menaxhimi më i mirë i plazheve kanë ndikuar në rritjen e ndjeshme të numrit të turistëve këtë vit.

Rreth 60% e plazheve në bashkinë e Shkodrës janë publike dhe po mirëmbahen në kuadër të operacionit kombëtar “plazhe të pastra”, që zhvillohet për të katërtin vit radhazi me mbështetjen e Agjencisë Kombëtare të Bregdetit.