Udhëtimet ndërkombëtare po bëhen më të lehta për disa pasagjerë.

American Airlines ka bashkëpunuar me Administratën për Sigurinë e Transportit (TSA) për të testuar një program të ri që lejon disa udhëtarë ndërkombëtarë të shmangin kontrollet e zakonshme të TSA-së dhe rishikimin doganor.

Programi, i quajtur One Stop Security (OSS), do t’u mundësojë pasagjerëve që pas mbërritjes nga jashtë vendit të kalojnë direkt në fluturimin e radhës pa pasur nevojë të rimarrin dhe riregjistrojnë bagazhet të cilat do të transferohen automatikisht në fluturimin lidhës, shkruan NyPost, transmeton AutoPortali.

Sipas një raporti të Fox News, kompania Delta Airlines pritet të nisë testimin e saj më 30 korrik me pasagjerët që udhëtojnë nga aeroporti London Heathrow drejt Hartsfield-Jackson Atlanta International Airport.

OSS synon të përmirësojë ndjeshëm përvojën e udhëtimit duke përdorur teknologji të avancuar për të përgjysmuar kohën e tranzitit kohë që zakonisht përfshin kalimin nëpër doganë, marrjen e bagazheve, riregjistrimin e tyre dhe kalimin sërish në kontrollin e TSA-së.

“One Stop Security është një nga përmirësimet më vizionare që mund t’i sjellim udhëtimit ndërkombëtar dhe më e rëndësishmja, klientëve tanë sepse ofron një nivel komoditeti dhe kursimi kohe që nuk ka qenë kurrë i mundur më parë për ata që lidhin fluturime ndërkombëtare,” tha David Seymour, drejtues operativ i American Airlines.

“Me këtë program që ndryshon lojën, falë bashkëpunimit me partnerët tanë federalë në CBP dhe TSA, si dhe Aeroportin DFW, klientët tanë do të kalojnë shumë më pak kohë në stresin e kalimit tranzit dhe më shumë kohë duke shijuar udhëtimin.”

Programi aktualisht po testohet përmes nyjës më të madhe të American Airlines, aeroportit Dallas Fort Worth (DFW), dhe vetëm për fluturimet që vijnë nga London Heathrow.

Udhëtarët që fluturojnë nga Londra dhe ndalojnë në Dallas do të jenë në gjendje të kryejnë kontrollin doganor menjëherë te porta e mbërritjes.

American Airlines është kompania e parë që implementon OSS në një aeroport amerikan dhe “ka në plan të shqyrtojë mundësinë për zgjerimin e këtij shërbimi” në fluturime dhe aeroporte të tjera në të ardhmen.

“One Stop Security është një hap i zgjuar dhe i shumëpritur drejt modernizimit të përvojës së udhëtimit, eliminimit të kontrollit të përsëritur, shkurtimit të kohës së lidhjes dhe zgjerimit të shërbimeve ndërkombëtare ajrore,” tha Geoff Freeman, President dhe CEO i US Travel, në një deklaratë të veçantë. /AutoPortali