Me një çmim të pozicionuar mes SUV-ve elektrikë të tregut masiv dhe atyre luksozë, EX30 Cross Country synon blerësit aventurierë por autonomia e kufizuar mund të jetë një pengesë serioze.

Volvo EX30, një crossover kompakt, praktik dhe me çmim të përballueshëm për një model elektrik, nuk ka marrë pritjen që ndoshta e meritonte, shkruan autoweek, transmeton AutoPortali.

Modeli doli në shitje në Europë në fund të vitit 2023, por në SHBA mbërriti vetëm në fund të 2024-ës. Arsyeja? Tarifat e vendosura nga administrata Biden për automjetet e prodhuara në Kinë, si EX30, që ndikuan drejtpërdrejt shpërndarjen.

Në momentin që EX30 mbërriti në tregun amerikan, në Shtëpinë e Bardhë kishte ardhur një administratë e re ajo Trump me plane për tarifa edhe më të ashpra ndaj Kinës dhe me synim eliminimin e kredive federale për blerësit e makinave elektrike. Ndërkohë, Volvo dhe pothuajse çdo prodhues tjetër automjetesh kishin investuar miliarda dollarë në teknologji elektrike.

Zgjidhja e Volvo-s? Ta zhvendosë prodhimin për tregun amerikan nga fabrika në Zhangjiakou, Kinë, drejt Ghent-it në Belgjikë, ku tarifa aktuale është “vetëm” 25%, ndjeshëm më e ulët sesa për makinat kineze.

E megjithatë, deri tani këtë vit, Volvo ka shitur më pak se 2,600 njësi EX30 në SHBA — një numër shumë i ulët për të qenë fitimprurës, sidomos kur krahasohet me pothuajse 10-fishin e shitjeve të XC60 me motor me djegie të brendshme gjatë të njëjtës periudhë.

Volvo i flet aventurierëve

Për të zgjeruar audiencën dhe për t’i dhënë modelit më shumë “muskuj”, Volvo sjell këtë vjeshtë modelin EX30 Cross Country 2026, i ndërtuar për tipat që duan të mbajnë biçikleta, të vendosin kajakë në çati apo të ngulin një tendë në natyrë.

Modeli vjen si variant i pajisjes Ultra, e cila aktualisht nis nga 47,895 dollarë (përfshirë taksat e destinacionit). EX30 Cross Country ofron 7.5 inç lartësi nga toka më lart se modeli bazë, por shumë më pak se një Jeep Wrangler Rubicon, kështu që mos prisni ndonjë fuqi ekstreme në terrene të vështira.

Por për një rrugë me zhavorr që kalon kodra e fusha deri në një vend-kampim buzë liqenit, ky është vendi ku Cross Country shkëlqen. Si të gjitha EX30-të, edhe ky variant mund të tërheqë deri në 2,000 paund – e mjaftueshme për një rimorkio të vogël për kamping.

EX30 është më i shkurtër se një Ford Escape, vetëm 167 inç gjatësi totale dhe me një hapësirë bagazhi prej më pak se 32 kubikë çka do të thotë se kufizimet për udhëtime familjare janë të dukshme.

Problemi: autonomia është shumë e ulët

Me një bateri prej 69 kWh (64 kWh të përdorshme), EX30 Cross Country ofron 227 milje autonomi diçka që do të ishte pranuar katër vite më parë, por sot është prapa krahasuar me konkurrentë si Chevy Equinox EV apo Nissan Ariya.

Volvo ndoshta e ka llogaritur se klientët e këtij modeli nuk largohen shumë nga shtëpia dhe preferojnë një çmim më të ulët sesa një bateri më të madhe. Por realiteti është që Toyota ofron dy variante baterish për modelin bZ4X, të dyja me autonomi më të madhe se EX30.

Për ata që kërkojnë më shumë kilometra, më mirë të zgjedhin versionin Plus ($46,195) apo Ultra me goma 19 inç, që ofron 253 milje autonomi.

Por nëse fokusi është komoditeti në drejtim dhe performanca, Cross Country qëndron mirë përballë çdo EV të ri. Të tre versionet Pure, Ultra dhe Cross Country ofrojnë drejtim të qëndrueshëm, timon preciz dhe qetësi të madhe akustike. Ndryshimi kryesor është në aerodinamikë, ku Cross Country ka një koeficient rezistence më të lartë (0.30) për shkak të ngritjes nga toka dhe shtesave në karroceri, krahasuar me 0.28 të modelit standard.

E fortë – por jo për terren ekstrem

Suspensioni i pasmë me pesë lidhje është më i butë, për rehati në rrugë, por s’ka terren të egër në itinerarin e testimit në bregun perëndimor të Suedisë, rreth dy orë larg Gothenburg-ut. “Off-roading” në Skandinavi nuk ngjan fare me versionin amerikan të konceptit.

Megjithatë, Cross Country shfrytëzoi fuqinë prej 422 kuajfuqi dhe 400 lb-ft çift rrotullues në autostrada dhe rrugë të ngushta. Të gjitha EX30-të për tregun amerikan kanë traksion të katër rrotave, me nga një motor në secilin bosht, ndonëse Volvo shet edhe version me traksion të pasëm jashtë SHBA-së (me 275 milje autonomi) dhe ka në plan ta sjellë edhe atje.

Brendësia është e njëjtë si në EX30-të e tjerë: materiale të ricikluara, dy ngjyra për tapiceri Pine (jeshile) dhe Indigo (blu e thellë) dhe sedilje të forta, por mbështetëse.

Për dashamirët e minimalizmit, kontrolli i funksioneve realizohet me disa butona në timon dhe dy komanda qendrore për dritaret. Pjesa tjetër kalon përmes sistemit infotainment të mbështetur nga Google për klimën, navigimin, muzikën dhe çdo gjë tjetër.

Pamja e jashtme dallohet nga parakolpet me mbrojtëse të zgjatura, pjatat mbrojtëse përpara dhe mbrapa, si dhe mburoja e përparme matte-black që mban një hartë topografike të malit Kebnekaise në veri të Suedisë, me koordinatat e sakta gjeografike.

Çmimi, afër Lexus RZ, por më i lirë se Audi dhe Mercedes

Nëse çmimi i Cross Country mbetet nën 50,000 dollarë, do të jetë pak më i shtrenjtë se modelet e pajisura mirë si Ariya apo Toyota bZ, por më lirë se Audi Q4 e-tron, Cadillac Optiq, Genesis GV60 dhe Mercedes EQB – duke u renditur pranë Lexus RZ.

Për momentin, nuk ka ndryshime çmimi për modelet e vitit 2025, pavarësisht nëse vijnë nga Kina apo Belgjika. Por me tarifat që priten të rëndojnë më shumë për automjetet e vitit 2026, mund të jetë koha e duhur për ta blerë tani. Shitësit janë të etur për të ulur inventarin. /AutoPortali