Tesla Cybertruck mund të mos jetë më thjesht një veturë për entuziastët e teknologjisë – së shpejti mund ta shihni të patrullojë rrugët si automjet policie. Kompania UP.FIT, një degë e modifikuesve të njohur Unplugged Performance, ka njoftuar planet për të konvertuar Cybertruck-un për përdorim nga forcat e rendit, me dërgesat e para të planifikuara për më vonë këtë vit.

Modeli i personalizuar përfshin drita policie, sirena, radio të avancuara, sistem PA dhe mundësi për shufër shtytëse, ndarje për të burgosurit, magazinim armësh dhe pajisje për qentë K9, shkruan Car and Driver, transmeton AutoPortali.

Me karrocerinë e tij prej çeliku inoks dhe rezistencë balistike ndaj armëve të vogla, UP.FIT e quan Cybertruck-un automjetin më të aftë që ka ndërtuar deri më tani.

Përveç përdorimit në patrullim, Cybertruck mund të përshtatet edhe për misione taktike, ushtarake dhe kërkim-shpëtimi, madje edhe me lidhje satelitore nga Starlink. UP.FIT thotë se ka marrë interes të madh nga agjencitë dhe porositë janë tashmë të hapura.