Motorët e ardhshëm me djegie të brendshme do të përshtaten për çdo sistem fuqizimi.

Toyota nuk ka ndërmend të heqë dorë nga motori me djegie të brendshme (ICE), pavarësisht rritjes së prodhimit të automjeteve elektrike. Prodhuesi më i madh i makinave në botë ka ripohuar angazhimin afatgjatë për këtë teknologji, duke bashkëpunuar me markat japoneze Subaru dhe Mazda për një familje të re motorësh me benzinë.

Njësitë e reja katërcilindërshe, më të vogla dhe më të lehta, përshkruhen nga shefi i teknologjisë së kompanisë, Hiroki Nakajima, si një “zgjidhje revolucionare”.

Toyota planifikon t’i përdorë motorët 1.5 dhe 2.0 litra pothuajse në çdo lloj sistemi fuqizimi. Nënkryetari i Toyota Europe për Strategjinë e Produktit dhe Marketingun, Andrea Carlucci, tha për Automotive News se çelësi është shumëllojshmëria: “Po përpiqemi ta optimizojmë motorin e ri për çdo lloj aplikimi, qoftë elektrik, hibrid apo me hidrogjen.”

Megjithëse ideja e një motori me benzinë në një makinë elektrike mund të duket e çuditshme, Toyota ka parasysh automjetet elektrike me rreze të zgjatur (EREV). Në këtë konfigurim, motori nuk lëviz rrotat, por funksionon vetëm si gjenerator për të rimbushur baterinë gjatë udhëtimit, duke punuar në kushte optimale për efikasitet maksimal.

Shembuj të tillë përfshijnë BMW i3 REX, Ramcharger, Mazda MX-30, modelet e Scout dhe Nissan me teknologjinë E-Power.

Toyota tashmë ka paralajmëruar se do të shesë automjete EREV në Kinë përmes partneritetit lokal me GAC, duke i ofruar SUV-it Highlander dhe minivan-it Sienna këtë sistem. Në këto modele, lëvizja do të vijë vetëm nga motorët elektrikë, ndërsa motori me benzinë do të shërbejë vetëm për të zgjatur rrezen pa e hequr plotësisht karburantin tradicional.

Që nga viti 2018, Toyota ka arritur efikasitet termik 41% dhe synon ta përmirësojë më tej këtë shifër. Motorët e rinj do të mund të punojnë jo vetëm me karburant fosil, por edhe me biokarburant, hidrogjen dhe karburante sintetike.

Përveç hibrideve të plota dhe EREV-ve, Toyota po eksploron edhe hibride plug-in me autonomi të gjatë, me synimin që 100 km pa konsumuar fare benzinë të jetë pika e kthesës për tregun.

Motorët e konfirmuar përfshijnë versione atmosferike dhe turbo 1.5 litra, si dhe një motor turbo 2.0 litra. Ky i fundit do të ketë edhe variant sportiv për modelet Gazoo Racing (GR), duke prodhuar deri në 600 kuaj fuqi për makinat garuese.

Carlucci shtoi se Toyota po mendon edhe për arkitekturën e automjeteve:
“Shumica kanë marrë një platformë për motor me djegie dhe e kanë përshtatur për elektrifikim. Pse të mos krijojmë një platformë të dedikuar për EV dhe ta përshtatim për hibrid plug-in ose hibrid të plotë, pa sakrifikuar avantazhet e saj?”

Edhe pse platformat e dedikuara elektrike nuk janë risi (Tesla, Volkswagen MEB, Hyundai/Kia E-GMP, Mercedes EVA), disa prej tyre mund të akomodojnë edhe motorë me djegie, si platformat STLA të Stellantis apo SSP e ardhshme e VW.

Ashtu si kryetari i Toyota-s, Akio Toyoda, që ka deklaruar se automjetet elektrike nuk do të arrijnë kurrë më shumë se 30% të tregut, Carlucci beson se elektrifikimi nuk është rruga e vetme drejt dekarbonizimit. Sipas tij, shumëllojshmëria e sistemeve të fuqizimit u jep klientëve lirinë e zgjedhjes: “Nuk do të shtyjmë shitjen e EV-ve në tregje ku nuk ka kërkesë.” /AutoPortali