Gordon Murray Automotive ka prezantuar modelin ekskluziv S1 LM, një supermakinë e ndërtuar në vetëm pesë njësi për një klient të vetëm. Frymëzuar nga legjenda McLaren F1 GTR, kjo makinë e re sjell në pistë një kombinim të dizajnit ikonik, motorit V12 atmosferik dhe teknologjisë më të fundit.
Me mbi 690 kuaj fuqi dhe dorëzime të parashikuara në vitin 2026, S1 LM shihet si një homazh i përkryer ndaj historisë së Le Mans.
Gordon Murray Automotive ka hyrë në botën e supermakinave të prodhimit ultra të kufizuar, shkruan Motor1, transmeton AutoPortali.
Në rritje të vazhdueshme në segmentin e hiperekzotikëve, S1 LM është produkti i parë i linjës “Special Vehicles” të kompanisë, krahas Le Mans GTR, dhe padyshim një nga surprizat më të mëdha të Monterey Car Week.
I bazuar mbi platformën e T.50, S1 LM përshkruhet nga GMA si një makinë me “konfigurim radikal për pistë”, që “i bën homazh bukurisë së përjetshme të dizajnit origjinal fitues në Le Mans të Murray-t”.
Modeli rikthen elementë klasikë të F1 GTR-së, si marrësin e ajrit të vendosur mbi çati dhe sistemin e shkarkimit qendror me katër dalje, ndërkohë që shton një krahë të pasëm të ndarë dhe difuzor gjigant.
Nga disa kënde duket si binjaku i makinës që triumfoi 30 vite më parë.
S1 LM është para së gjithash një makinë piste: ka pezullim më të fortë, motor të montuar ngurtë dhe një paketë aerodinamike me splitter masiv, krahë të mëdhenj dhe difuzor, që gjenerojnë forcë të madhe poshtëruese.
Ashtu si çdo model rrugor i GMA, do të ketë motor V-12 atmosferik dhe transmetim manual me gjashtë marshe. Ky variant ka kapacitet 4.3 litra dhe prodhon mbi 690 kuaj fuqi.
Do të ndërtohen vetëm pesë njësi të S1 LM, të gjitha për një klient të vetëm, për një çmim që nuk është zbuluar.
Dorëzimet pritet të nisin në vitin 2026. Shumëkush spekulon se blerësi mund të synojë të krijojë një mini-seri garash private luks që vetëm pak njerëz në botë mund ta përballojnë.
“Gordon Murray Group ka në themel përsosmërinë në drejtim, lehtësinë, artin e inxhinierisë dhe ekskluzivitetin,” u shpreh CEO i kompanisë, Phil Lee.
“Divizioni GMSV na lejon të eksplorojmë këto parime, të ushqyera nga pasioni dhe imagjinata e klientëve tanë. Po punojmë për më shumë modele dhe mezi presim të bashkëpunojmë me entuziastët më të mëdhenj të botës së makinave për të krijuar vepra arti automobilistike.” /AutoPortali
