Sipas një studimi të Comparis, sigurimi për makinat elektrike kushton më pak se për makinat me motorë me djegie të brendshme në 70% të rasteve. Diferenca mund të arrijë deri në 500 franga për sigurimin gjithëpërfshirës, përveçse tek shoferët e rinj.

Shumica dërrmuese e shoferëve me përvojë paguajnë më pak për policën e sigurimit nëse zgjedhin një makinë elektrike, sipas studimit të publikuar të martën nga platforma e krahasimeve online Comparis. Shumë kompani sigurimesh ofrojnë ulje “eko” deri në 20%.

Por për të rinjtë situata është ndryshe: vetëm gjysma prej tyre përfitojnë ulje. Madje, shoferët fillestarë shpesh paguajnë më shumë për sigurimin e një makine elektrike sesa për një makinë me benzinë.

Më shumë aksidente tek të rinjtë

Pse ndodh ky ndryshim? Sipas Comparis, siguruesit ofrojnë zbritje vetëm nëse u rezulton fitimprurëse. Statistikat tregojnë se të rinjtë kanë më shumë gjasa të përfshihen në aksidente rrugore, veçanërisht në qytet, kur ngasin makina elektrike.

Shembull tipik është një model Mercedes elektrik, i cili përshpejton nga 0 në 50 km/h për vetëm 3.2 sekonda. Sipas Comparis, shoferët e rinj shpesh nënvlerësojnë fuqinë që makina shfaq në nisje, gjë që çon në aksidente në kryqëzime, parkingje apo semaforë.

Çmimi varet nga profili i shoferit

Në përfundim, të kesh një makinë elektrike nuk është as avantazh e as disavantazh i garantuar për të ulur primin e sigurimit. Çmimi i policës varet kryesisht nga vlera e automjetit, përdorimi i tij dhe profili i shoferit.