Nissan Xterra mund të rikthehet si SUV elektrik deri në vitin 2028, nëse zhvillimet politike dhe tregtare në SHBA nuk e pengojnë planin.

Kompania ka dorëzuar një aplikim për markën tregtare të emrit “Xterra” në SHBA, ndërsa një imazh promovues i modeleve të ardhshme të Nissan tregoi një SUV me formë kutizore, relina të theksuara në tavan dhe një siluetë të njohur për fansat e modelit të dikurshëm.

Sipas Motortrend, shefi i planifikimit në Nissan, Ponz Pandikuthira, në një intervistë për Autoblog tha se ringjallja e Xterra-s po “merret në konsideratë shumë seriozisht”, duke shtuar se po diskutohet edhe pamja e mundshme e modelit të ri, transmeton AutoPortali.

Rikthimi i Xterra-s shihet si një lëvizje logjike, pasi tregu po mbushet me SUV-e të orientuara për terrene të vështira, si Ford Bronco dhe Toyota Land Cruiser. Gjenerata e parë e Xterra-s (2000–2015), që fitoi çmimin “Truck of the Year” nga MotorTrend në vitin 2000, pati sukses pikërisht në këtë segment.

Platforma dhe motorizimi

Sipas të dhënave fillestare, Nissan planifikon që modeli i ri të ketë motor elektrik me bateri. Prototipi i prezantuar kishte një hundë të shkurtër dhe hapësirë të mjaftueshme midis akseve për të vendosur baterinë, çka e mbështet këtë skenar.

Po ashtu, e njëjta platformë pritet të përdoret edhe për një SUV elektrik me formë kupe të markës Infiniti. Të dy modelet do të prodhohen në fabrikën e Nissan në Misisipi, e cila po përshtatet me investime të mëdha për prodhimin e automjeteve elektrike.

Megjithatë, planet e Nissan janë përballur me sfida. Kompania ka njoftuar masa të rrepta kursimi, ka reduktuar numrin e platformave globale dhe ka anuluar ndërtimin e një fabrike baterish në Japoni. Përveç kësaj, ndryshimet e shpeshta në subvencionet dhe tarifat për makinat elektrike në SHBA kanë shtyrë nisjen e Xterra-s nga viti 2027 në fund të vitit 2028, ndërsa modeli i lidhur i Infiniti-t është planifikuar për vitin 2029.

Alternativat e mundshme

Pavarësisht pasigurive, analistët besojnë se Xterra ka gjasa të mbijetojë edhe nëse Nissan anulon disa nga projektet tjera elektrike. Një SUV elektrik i aftë për terrene të vështira, me dizajn robust dhe hapësirë të madhe nga toka, mund të ketë kërkesë edhe jashtë tregut amerikan.

Një opsion tjetër, ndonëse më pak i mundshëm, është kthimi i Xterra-s në rrënjët e saj duke u bazuar në platformën e pikapit Frontier, me trup mbi shasi dhe motor me djegie të brendshme. Një version i tillë do të mund të konkurronte drejtpërdrejt me Bronco-n dhe Land Cruiser-in, sidomos nëse prodhohet në SHBA për të shmangur tarifat dhe taksat doganore.

Çmimi dhe lansimi

Çmimi i pritshëm i modelit varion mes 38.000 dhe 48.000 dollarëve, ndërsa lansimi i tij në treg pritet në fund të vitit 2028. /AutoPortali