Rolls-Royce ka zbuluar një version të ri të personalizuar të kupeve elektrike Spectre, të quajtur Inspired by Primavera, që do të jetë i disponueshëm për porosi deri në fund të këtij viti, me dërgesat e para të planifikuara për pranverën e vitit 2026.

Sipas kompanisë, seria e re është një “shprehje poetike e pranverës”, e materializuar përmes detajeve të punuara me dorë dhe elementeve që evokojnë rigjallërimin e stinës.

Tre variante tematike do të ofrohen, Evanescent, Reverie dhe Blossom, secili me kombinime unike ngjyrash dhe materialesh.

Detajet e jashtme përfshijnë një vijë të dorëvizatuar që paraqet një degë qershie në lulëzim, rrota 23-inçare të dizajnuara për të ngjarë me petale lulesh dhe motive qershie të aplikuara me dorë në karroceri.

Brenda kabinës, lulet e qershisë janë të qendisura në mbështetëset e kokës dhe të gdhendura me lazer në panele druri Blackwood, një proces që kërkoi 37 densitete të ndryshme lazeri dhe teknikë të re lëmimi.

Kulmi i brendshëm Starlight Headliner përshkruan “Trekëndëshin e Pranverës” me 4,796 pika ndriçuese të vendosura me dorë, ndërsa edhe paneli i instrumenteve ka mbi 5,500 pika ndriçuese shtesë.

Në aspektin mekanik, modeli nuk ndryshon nga Spectre standard, dy motorë elektrikë që prodhojnë 584 kuaj fuqi dhe 900 Nm çift rrotullues, me bateri 102 kWh që ofron rreth 468 kilometra autonomi sipas ciklit të testimit EPA.

Rolls ka prezantuar edhe versionin më të fuqishëm Black Badge me 659 kuaj fuqi dhe 1,074 Nm, por mbetet e paqartë nëse ai do të kombinohet me paketën Primavera. /AutoPortali