Transportuesit publikë dhe privatë kanë protestuar sërish sot, duke kërkuar realizimin e të drejtave të tyre, pasi që nga muaji maj nuk janë paguar nga Komuna e Prishtinës.

Ashtu si të hënën, edhe sot ata iu drejtuan komunës dhe qeverisë, duke kërkuar shlyerjen e borxheve dhe ekzekutimin e pagave, raporton Klankosova.tv, përcjell AutoPortali.

Një përfaqësues i operatorit privat bëri të ditur para mediave se autobusët, të parkuar në zonën e njohur si “Te plepat” dhe në rrugën “Agim Ramadani”, nuk do të largohen. Ai paralajmëroi se protestat do të vazhdojnë edhe të mërkurën, madje me kohëzgjatje më të madhe.

Si pasojë e kësaj proteste, disa nga rrugët kryesore të kryeqytetit janë bllokuar plotësisht.

Të hënën, protestës së operatorëve iu bashkua edhe kryetari i Prishtinës, Përparim Rama, i cili kërkoi takim urgjent me kryeministrin në detyrë, Albin Kurtin, dhe ministrin në detyrë të Financave, Hekuran Muratin. Megjithatë, kërkesa e Ramës u refuzua. Më vonë u mbajt një takim mes Muratit dhe operatorëve publikë e privatë, i cili doli të ishte joproduktiv.

Ndërkohë, përfaqësuesi i “Trafikut Urban”, Ilmi Gashi, kërkoi me ngulm që kërkesat e tyre të plotësohen sa më parë.

Për gjendjen e trafikut sot, lexues të Klankosova.tv kanë dërguar edhe pamje.