Mercedes ka prezantuar AMG GT SUV, një model plotësisht elektrik që në versionin më të fuqishëm, GT 63, zhvillon 1.169 kuaj fuqi dhe 2.000 Nm çift rrotullues.

SUV-i i ri ka një dizajn sportiv, me gjatësi 5,08 metra dhe peshë rreth 2,5 tonë. Bagazhi ofron 607 litra hapësirë, ndërsa me sediljet e pasme të palosura kapaciteti rritet në 1.740 litra.

Tri versione me fuqi mbresëlënëse
GT 53: 544 kuaj fuqi, nga 0 në 100 km/h për 4,2 sekonda.
GT 55: 816 kuaj fuqi, nga 0 në 100 km/h për 3,1 sekonda.
GT 63: 1.169 kuaj fuqi, nga 0 në 100 km/h për vetëm 2,7 sekonda.

Shpejtësia maksimale arrin deri në 270 km/h te versionet më të fuqishme.

450 kilometra autonomi me vetëm 10 minuta karikim

Bateria me teknologji 800 V mbështet karikim të shpejtë deri në 710 kW. Sipas Mercedesit, kjo mundëson shtimin e autonomisë prej 450 kilometrash për vetëm 10 minuta. Autonomia maksimale e deklaruar arrin deri në 700 kilometra, sipas versionit.

Tingull artificial V8 për adhuruesit e AMG-së

Për të ruajtur emocionet e modeleve tradicionale, Mercedes ka përfshirë sistemin AMGFORCE Sport+, i cili simulon tingullin e motorëve me benzinë. Përmes altoparlantëve të jashtëm dhe atyre në kabinë, versionet GT 55 dhe GT 63 imitojnë ulërimën karakteristike të një V8-shi.

Sistemi simulon gjithashtu ndërrimin e marsheve dhe dërgon impulse mekanike në sediljet sportive, për të krijuar një përvojë më realiste gjatë vozitjes.

Çmimi dhe dalja në treg

Mercedes-AMG GT 53 SUV pritet të dalë në shitje në Gjermani në fund të tetorit 2026, me çmim fillestar prej 113.050 eurosh. Versionet GT 55 dhe GT 63 pritet të mbërrijnë në pranverën e vitit 2027.

Pavarësisht performancës mbresëlënëse, mbetet pyetja: a mundet një AMG elektrik me tingull artificial ta ruajë shpirtin e modeleve tradicionale me motor V8?