Presidenti i FIA-s, Mohammed Ben Sulayem, është optimist se garat e Formula 1 në Katar dhe Abu Dhabi do të zhvillohen sipas planit, pavarësisht tensioneve dhe konflikteve në Lindjen e Mesme.

Garat në Bahrein dhe Arabinë Saudite u anuluan më herët këtë vit për shkak të situatës së sigurisë, ndërsa organizatorët po monitorojnë nga afër zhvillimet në rajon.

“Ne nuk do ta dërgojmë kurrë stafin, pilotët apo zyrtarët në një vend që e konsiderojmë të rrezikshëm”, deklaroi Ben Sulayem, duke shtuar se aktualisht ndihet i sigurt për zhvillimin e dy garave.

FIA ka përgatitur edhe plane rezervë, përfshirë angazhimin e zyrtarëve lokalë dhe ekipeve alternative, në rast të problemeve me udhëtimet apo organizimin.

Ndërkohë, zhvillimi i Rally Dakar 2027 në Arabinë Saudite mbetet i pasigurt. Sipas Ben Sulayem, gara mund të zhvendoset në Marok nëse situata nuk lejon organizimin e saj në vendin arab.