Audi ka hequr dorë nga ideja se do të ndalojë së prodhuari makina me motorë me djegie të brendshme deri në vitin 2033 dhe do të mbetet fleksibël për të ardhmen e parashikueshme, pasi monitoron nga afër kushtet e tregut. Pritej, apo jo? Duke ndjekur impulset e tregut, pothuajse secili prej nesh mund t’u kishte sinjalizuar drejtorëve të Audi-t përpara se të miratohej strategjia elektrike se nuk do të shkonte mirë. Audi-ja e fundit e re me motorë me djegie të brendshme duhej të debutonte në vitin 2026, por kjo nuk është më rasti. Drejtori ekzekutiv i Audi-t, Gernot Dolner, zbuloi se kompania ka vendosur të zgjasë prodhimin e makinave me benzinë, naftë dhe hibride. Ai mbron qëndrimin se menaxhmenti i mëparshëm ishte përgjegjës për strategjinë e mëparshme.
– Audi po lançon një linjë krejtësisht të re automjetesh me motorë me djegie të brendshme dhe automjete hibride plug-in nga viti 2024 deri në vitin 2026, dhe kjo na jep fleksibilitet të plotë për të paktën shtatë, tetë, ndoshta 10 vjet të tjera, dhe (vetëm) atëherë do të shohim se si do të zhvillohen tregjet tona – tha Dolner për Autocar në një intervistë të re.
Vendimi për të zgjeruar prodhimin e motorëve me djegie të brendshme përfshin modelet e ardhshme RS nga Audi Sport, siç është gjenerata e ardhshme RS6, e cila pritet të ketë një sistem hibrid plug-in. Kur u pyet për R8 ose TT të ri, Dolner u përgjigj se Audi po mendon për gjithçka… Epo, kohërat po ndryshojnë.
