Audi ka vendosur të ndërmarrë hapa konkretë për të rifituar terrenin në treg pas një viti të vështirë për sa i përket shitjeve, sidomos në segmentin e automjeteve elektrike. Prodhuesi gjerman i veturave luksoze ka njoftuar se duke filluar nga viti i modelit 2026, të gjitha automjetet e reja  përfshirë ato me qira  do të përfitojnë nga një plan i mirëmbajtjes falas të quajtur Audi Signature Care.

Ky shërbim përfshin tre vizita falas në servis, të cilat mund të kryhen çdo 10,000 milje apo një herë në vit, në varësi të asaj që ndodh më parë. Paketat përfshijnë ndërrim vaji, inspektime shumëpikëshe dhe madje një zëvendësim të vetëm të lëngut të frenave, duke e rritur ndjeshëm vlerën për klientët ekzistues dhe të ardhshëm, shkruan Car and Driver, transmeton AutoPortali.

Vendimi vjen në një kohë kur Audi është përballur me kritika për politikat e saj të emërtimit, të cilat tashmë janë braktisur, dhe me presion të lartë për të qenë më konkurrues ndaj markave rivale të luksit si BMW, Genesis, Volvo dhe Lexus, të cilat prej vitesh ofrojnë mirëmbajtje të planifikuar falas.

BMW, për shembull, ofron tre vjet ose 36,000 milje shërbim falas, ndërsa Lexus dhe Porsche i cili ashtu si Audi është pjesë e Grupit Volkswagen ofrojnë vetëm shërbimin e parë falas. Ndërkohë, Mercedes-Benz mbetet ndër të paktat brende të luksit që nuk përfshijnë shërbimin e planifikuar në paketat standarde, gjë që tashmë e bën Audin një alternativë më tërheqëse për konsumatorët që kërkojnë lehtësim financiar në kostot e mirëmbajtjes.

Me këtë lëvizje, Audi synon jo vetëm të përmirësojë përvojën e klientëve, por edhe të rifitojë pozitën në tregun gjithnjë e më konkurrues të veturave luksoze, ku vlera e shtuar e mirëmbajtjes luan një rol kyç në vendimmarrjen e blerësve.