Procesi i aplikimit për vizën Schengen pritet të bëhet shumë më efikas dhe modern, pasi Bashkimi Evropian po kalon drejt një sistemi plotësisht digjital. Me këtë ndryshim, aplikimet në letër dhe pullat tradicionale të vizave do të jenë gjë e së kaluarës.
EconomicTimes shkruan se në vend të pullës së vizës do të vendoset një kod digjital 2D i enkriptuar, që rrit sigurinë, përshpejton procedurat dhe reflekton përqafimin e teknologjisë nga BE.
Sipas “Travel + Leisure”, zbatimi i plotë i këtij sistemi parashikohet të përfundojë deri në vitin 2028, transmeton AutoPortali.
Si do të funksionojë?
Si pjesë e një projekti pilot për Lojërat Olimpike Paris 2024, Franca ka lëshuar 70 mijë viza digjitale Schengen me kod 2D. Kur sistemi të vihet plotësisht në funksion, udhëtarët do të skanojnë këtë kod në pikat kufitare, ndërsa zyrtarët e migracionit do të kenë qasje të drejtpërdrejtë në të dhënat personale dhe të vizës përmes një databaze të përbashkët të BE-së.
Sistemi digjital do të mundësojë një përvojë tërësisht online, ku aplikuesit mund të ngarkojnë dokumentet, të ndjekin statusin e aplikimit dhe të paguajnë tarifat pa u paraqitur fizikisht. Pas përfundimit të këtyre hapave, udhëtarët do të marrin vizën në formë kodi të nënshkruar digjitalisht. Vizitorët që hyjnë për herë të parë në BE do të duhet të japin të dhëna biometrike fizikisht, ndërsa për udhëtimet e përsëritura, procesi do të jetë më i thjeshtuar.
Për çdo përditësim, udhëtarët këshillohen të ndjekin faqen zyrtare të BE-së për vizat.
Udhëzues hap-pas-hapi për të aplikuar për vizën Schengen
1. Zgjidh ambasadën përkatëse
Apliko në ambasadën e vendit ku do të kalosh më shumë kohë. Nëse kohëzgjatja në çdo shtet është e njëjtë, apliko te ambasada e vendit ku hyn i pari.
Shumica e vendeve përdorin platformën VFS Global; Spanja përdor BLS International (në Indi).
Franca kërkon caktimin e terminit përmes platformës online Démarches Simplifiées.
2. Përgatit dhe dorëzo dokumentet
Në ditën e terminit, sjell: pasaportë të vlefshme (min. 6 muaj, 2 faqe bosh), formularin e aplikimit, fotografi, sigurim udhëtimi (minimum €30,000 mbulim), rezervime fluturimi dhe hoteli/turneu, letër motivimi dhe prova financiare (3–6 muaj llogari bankare, fletëpagesa ose deklarata tatimore).
3. Shko për të dhënat biometrike
Aplikuesit për herë të parë duhet të japin shenjat e gishtërinjve dhe një fotografi. Të dhënat ruhen në sistemin VIS të BE-së. Nuk nevojitet nëse të dhënat janë mbledhur brenda 59 muajve të fundit.
4. Paguaj tarifat
Tarifa standarde është rreth €80 për të rriturit dhe €40 për fëmijët 6–12 vjeç (falas për nën 6 vjeç). Tarifat e shërbimit për VFS/BLS variojnë rreth ₹1,800–₹2,200.
5. Prit për përpunim
Koha standarde është 15 ditë kalendarike, por mund të zgjasë deri në 30 ose 60 ditë në periudha të ngarkuara ose raste të ndërlikuara.
Këshilla shtesë dhe informacione të dobishme
Apliko 30–60 ditë para udhëtimit. Aplikimet pranohen deri në 6 muaj përpara, por shmang afatet e ngushta (më pak se 15 ditë pune).
Për përpunim më të shpejtë, konsidero ambasadat e Lituanisë, Letonisë apo Estonisë, të cilat zakonisht mbarojnë procedurën brenda 7–10 ditëve dhe kanë norma refuzimi më të ulëta.
Intervistë: disa ambasada si Gjermania apo Franca mund të kërkojnë intervistë fizike. Përgatitu të shpjegosh itinerarin, burimet financiare dhe arsyet pse do të kthehesh. Fol me siguri dhe sinqeritet.
Gjermania ndryshon rregullin e ankesës: nga 1 korriku 2025, nuk lejohen më ankesa informale; aplikimet e refuzuara mund të apelohen vetëm përmes rrugëve ligjore.
Vizë shumëhyrëse me vlefshmëri më të gjatë: qytetarët indianë që kanë përdorur dy viza Schengen brenda tre viteve mund të kualifikohen për viza 2-vjeçare ose 5-vjeçare, sipas sistemit “cascade” të BE-së. /AutoPortali
