Bentley ka zbuluar konceptin e saj më të fundit dhe më dramatik deri më tani – EXP 15, një limuzinë e ngritur me gjatësi 5.4 metra që synon të formësojë të ardhmen e dizajnit të markës britanike. Ky model konceptual, që qëndron mes një sedani, një SUV-i dhe një grand tourer-i, mund të shndërrohet në pasardhësin e shumëpritur të Mulsanne, modelit flagrant të Bentley-t që doli nga prodhimi disa vite më parë.
EXP 15 është një deklaratë ambicioze dizajni nga Robin Page, drejtori i ri i dizajnit të Bentley-t, i cili u rikthye në markë në vitin 2023 pas një periudhe të gjatë në Volvo. Page, që më parë ka punuar për 17 vjet në ekipin e dizajnit të brendshëm të Bentley-t në Crewe, e sheh EXP 15 si një hap të madh përpara për gjuhën vizuale të markës, shkruan Autocar, transmeton AutoPortali.
“Është ende në atë linjë lineare karakteristike të Bentley-ve, por është një fillim i ri – një gjuhë e re dizajni,” tha Page për Autocar. “Qëllimi është të bëjmë një shpërthim të vogël: kapitulli tjetër.”, tha drejtori i ri i dizajnit të Bentley-t.
Ai shtoi se dizajni i ri synon një estetikë më monolitike, të fortë dhe të pastër, duke shmangur komplikimet e panevojshme në forma dhe sipërfaqe – një qasje që do të shërbejë si bazë për valën e parë të modeleve elektrike të Bentley, duke filluar me një SUV urban që do të lançohet vitin e ardhshëm dhe do të pozicionohet nën Bentayga-n.
Koncepti EXP 15 frymëzohet nga disa prej modeleve historike më ikonike të Bentley-t, veçanërisht nga Speed Six i vitit 1928, i njohur ndryshe si ‘Blue Train’, për garën legjendare që drejtuesi Woolf Barnato fitoi kundër trenit ekspres ‘Train Bleu’ nga Kana në Londër.
Nga kjo makinë ikonike, EXP 15 huazon pesë tema kryesore dizajni, që do të përcaktojnë gjeneratën e ardhshme të linjës Bentley. Një nga këto është ajo që Page e quan “elegancë e drejtë”, e reflektuar në pjesën e përparme të drejtë dhe vertikale të konceptit – një ndryshim i qartë nga dizajni më i pjerrët i modeleve aktuale si Continental GT apo Flying Spur.
“Ajo që duam të kapim është ajo ndjesi krenarie dhe autoriteti,” tha Page.
