Champions League vazhdon edhe sonte me ndeshje të zjarrta
C

Champions League vazhdon edhe sonte me ndeshje të zjarrta

Champions League rikthehet sonte me nëntë ndeshje të tjera të fazës së ligës, pas një mbrëmjeje plot emocione dhe rezultate interesante. Spektakli pritet të jetë edhe më i madh, pasi programi i sonte ofron disa prej dueleve më të forta të këtij edicioni.

Në krye të listës qëndron supersfida e natës: Arsenal – Bayern Munich, e cila do të zhvillohet në “Emirates Stadium”. Të dyja skuadrat kanë shkëlqyer deri tani në Champions League, duke regjistruar nga katër fitore në katër ndeshjet e para dhe duke kryesuar tabelën. Përballja e tyre pritet të jetë një test i vërtetë force mes dy prej pretendenteve kryesore për trofeun.

Një tjetër duel i zjarrtë është ai që do të luhet në “Wanda Metropolitano”, ku Atletico Madrid pret Interin. Skuadra e Simone Inzaghit vjen në këtë ndeshje me një formë perfektë, katër fitore në po aq ndeshje dhe synon të vazhdojë rrugëtimin pa humbje.

Nga ana tjetër, të përzgjedhurit e Diego Simeones kanë dy fitore dhe dy humbje deri tani, por fitorja kundër nënkampionit të Europës do të ishte dëshmi e ambicieve të tyre në këtë edicion.

Në Paris, kampioni aktual evropian Paris Saint-Germain pret Tottenhamin, në një nga sfidat më intriguese të mbrëmjes.

“Spurs” nuk kanë pësuar asnjë humbje në këtë edicion të Champions League, ndërsa PSG ka regjistruar tri fitore dhe një humbje. Atmosfera në “Parc des Princes” pritet të jetë elektrizuese, me të dyja skuadrat që synojnë kreun e grupit.

Ndërkohë, Liverpooli kërkon të rikthehet te fitorja para tifozëve të vet në përballjen ndaj PSV Eindhoven, një sfidë ku të kuqtë synojnë t’i japin fund serisë së dobët të ndeshjeve të fundit.

Në të njëjtën kohë, Real Madrid, rekordmeni i trofeve të Champions League, do të udhëtojë në Greqi për t’u përballur me Olympiacosin, një transfertë gjithmonë e vështirë për çdo skuadër.

Dy ndeshje do të nisin prej orës 18:45, ndërsa shtatë të tjera do të startojnë në 21:00, duke garantuar një natë të gjatë dhe emocionuese për të gjithë adhuruesit e futbollit europian. /AutoPortali

TË FUNDIT