Tifo-grupi “Dardanët” ka publikuar një njoftim të rëndësishëm një ditë para ndeshjes Kosovë–Zvicër në “Fadil Vokrri”, duke bërë të ditur se sot fillon shpërndarja e biletave për anëtarët e tyre.

Sipas njoftimit, biletat do të shpërndahen në fanclub-in në kryeqytet dhe në qytetet ku veprojnë përfaqësuesit e grupit.

“Dardanët” u bëjnë thirrje tifozëve që ndeshjen e fundit të këtij cikli ta mbyllin me dinjitet, ashtu si kanë bërë gjatë gjithë kualifikuesve, duke përfaqësuar me krenari popullin.

Njoftimi i tyre i plotë, pa ndërhyrje:

Sot, fillon shpërndarja e biletave për anëtarët tonë për ndeshjen kundër Zvicrës që luhet nesër mbrëma, e që mbyll ciklin historik të këtij grupi. Siç është bërë praktikë tani e një kohë, biletat do të shpërndahen te fanclub-i ynë në kryeqendër, si dhe në qytetet ku ndodhën përfaqësuesit tanë.

Para pushimit të gjatë katër-mujor deri në ndeshjet e playoff-it të muajit mars, le ta mbyllim nesër në mënyrë çfarë na ka hije këtë grup kualifikues, siç kemi dëshmuar tani e sa kohë, duke luajtur me plot dinjitet e si rrjedhojë duke e përfaqësuar dhe duke bërë të ndihet fort i dinjitetshëm një popull të tërë.

Armata dardane siç pushtoi çdo stadium këto muaj nëpër Evropë, edhe nesër do ta thotë fjalën e vete.