Sonte zhvillohet ndeshja e kthimit e raundit të tretë të Europa League, ku Drita do të përballet me FCSB-në në stadiumin “Fadil Vokrri”.

Pas një paraqitjeje mjaft të mirë në ndeshjen e parë në Bukuresht, ku pavarësisht humbjes 3-2, Drita arriti të shënonte dy gola në fushën e kundërshtarit, gjilanasit kanë ambicie për një fitore vendimtare para tifozëve të tyre dhe për të siguruar kualifikimin në fazën tjetër të garës.

Ndeshja pritet të jetë e fortë dhe emocionuese, me një atmosferë shumë të ngrohtë nga tifozët vendas që do ta mbështesin skuadrën me gjithë forcën, transmeton AutoPortali.

Mbrojtësi kolumbian Juan Camilo Mesa do të mungojë për shkak të lëndimit, por kjo nuk e dobëson aspak motivimin dhe dëshirën e Dritës për të arritur një rezultat pozitiv.

Në të njëjtën ditë, një tjetër skuadër kosovare, Ballkani, do të luajë në ndeshjen e kthimit të raundit të tretë të Conference League ndaj Shamrock Rovers në “Tallaght Stadium” në Dublin.

Pas fitores minimale 1-0 në stadiumin “Fadil Vokrri” në Prishtinë, ekipi nga Suhareka do të mundohet ta ruajë këtë avantazh dhe të sigurojë kalimin në fazën e “play-off”-it, duke përdorur taktika të kujdesshme dhe kundërsulme të shpejta për të befasuar kundërshtarin.

Irlandezët, të mbështetur fuqishëm nga tifozët e tyre të zjarrtë, do të tentojnë të bëjnë përmbysjen dhe të sigurojnë një vend në fazën tjetër të garës.

Ballkani konsiderohet skuadra më e suksesshme kosovare në garat evropiane, pasi ka arritur dy herë të kalojë në fazën e grupeve të Conference League, gjë që i jep më shumë përvojë dhe besim skuadrës në këtë përballje të rëndësishme.

Ndeshja mes Shamrock Rovers dhe Ballkanit do të nisë në ora 21:00, dhe pritet të jetë një duel mjaft i fortë dhe konkurrues, ku secila skuadër do të kërkojë me çdo kusht fitoren dhe kalimin më tej në garë. /AutoPortali