Ndeshja e zhvilluar mbrëmë mes Vëllaznimit dhe Bashkimit nuk nisi në mënyrën e duhur, pasi u shoqërua me një incident të rëndë që hodhi hije mbi takimin.

Situata doli jashtë kontrollit, duke shkaktuar shqetësim te lojtarët, stafet teknike dhe publiku i pranishëm.

Gjatë incidentit, ndihmëstrajneri i skuadrës së Bashkimit, Beldar Gjeqaj, mbeti i lënduar pasi u godit me një shishe në fytyrë nga tribuna.

Pas goditjes, atij iu ofrua ndihma mjekësore, ndërsa ngjarja shkaktoi reagime të menjëhershme në parket dhe në sallë.

Ky veprim i papranueshëm ka nxitur reagimin e Federatës së Basketbollit të Kosovës, e cila ka dënuar ashpër dhunën dhe sjelljen e tillë gjatë ndeshjeve zyrtare.

FBK theksoi se incidente të tilla janë në kundërshtim të plotë me vlerat e sportit dhe se do të ndërmerren masa për të identifikuar përgjegjësit dhe për të parandaluar përsëritjen e rasteve të ngjashme në të ardhmen.

Federata pritet të analizojë raportet zyrtare të ndeshjes dhe të marrë vendime disiplinore në ditët në vijim, ndërsa u bëri thirrje tifozëve që të respektojnë rregullat dhe të kontribuojnë në krijimin e një atmosfere sportive dhe të sigurt në palestrat e basketbollit./AutoPortali